Хоккей матчы нигә үтмәде?

“Салават Юлаев” хоккей клубының башкарма директоры Александр Курносов әйтүенчә, 31 декабрьдә команда Белоруссия башкаласы Минск шәһәрендә урындагы “Динамо” командасы белән очрашып, 5:3 исәбенә җиңүгә өлгәшкән. Тик... Уфага кайту белән биш уенчы тән температуралары күтәрелеп, ютәлләп авырый башлаган. Ике кеше шунда ук хастаханәгә салынган. Иң кызыгы шул: коронавируска алынган ПЦР-тестлар кире нәтиҗә биргән.

3 ноябрьдә “Салават Юлаев” Хабаровск каласының “Амур” командасы белән очрашып, 3:2 исәбе белән җиңүгә ирешкән. ПЦР-тестлар янә беркемнең дә чирләмәвен күрсәткән.

5 ноябрьдә “Салават” үз бозында Омск шәһәренең “Авангард” командасы белән очрашты һәм 2:4 исәбенә җиңелде. Монда иртә белән “Салават”лыларның күпчелегендә югары тән температурасы булган, шулай да аларның кайберләре бозга чыга алган. Авыру спортчылар урынын “Салават Юлаев”ның фарм-клубы “Торос” командасы уенчылары алган.

Тик иртәгәсен, ягъни “Трактор” белән очрашу алдыннан, югары тән температурасы “Салават Юлаев”ның төп составындагы 17 уенчыда теркәлгән! Моннан тыш, алмашка “Торос”тан килгән 5 хоккейчының 4се шулай ук температуралары күтәрелеп, авырый башлаган.

Нәтиҗәдә, Роспотребнадзор махсус тикшерү үткәреп, “Салават Юлаев” командасы өчен 7 көнлек карантин игълан иткән, ә 6 ноябрьдә үтәргә тиешле “Трактор” белән уен кичектерелгән.

Якташларыбыз чираттагы уеннарын 16 ноябрьдә Түбән Новгород шәһәрендә үткәреп, урындагы “Торпедо” командасы белән көч сынашырга тиеш.

Фото: sport.24.ru