Марат КӘРИМОВ. Утырып уйлар уйладым (9)

Шигырь – Коръәннең язылмый калган сүрәсе түгелме икән? Әллә догасымы?

* * *

Талантта терсәк булмый. Ул талантсызларда гына була. Шуның белән алар үзләренә юл яра. Әйтергә кирәк, теләкләренә ирешәләр дә.

* * *

Йөрәгемдә бер яра еллар буена бара.

* * *

Иренә мөкиббән киткән хатын. Ә анысы, әдәбиятча әйтсәк, кире герой. Аның кырын эшләрен хатынына җиткереп торалар, әмма ул ышанмый. Мәхәббәт сукыр була диләр. Сукыр гына түгел, саңгырау да икән ул.

* * *

Әгәр дә кеше тимер икән, ваклык – андагы тутык.

* * *

Кем боера – шул солтан, кем йөгерә – шул олтан.

* * *

Мин бәхетле булсам, шагыйрь дә булмас идем, диде бер каләмдәшем. Бу сүзләрдә дөреслек бардыр.

* * *

Аның чәче сары булса да, акылы алтын түгел иде.

Фото: Мунира  ВАФИНа.