* * *
Официант Чайбердин.
* * *
Шагыйрьләр – бай күңелле хәерчеләр.
* * *
Шагыйрь Т. телевизор аша күз дә йоммый сөйләп утыра: “Мин халкымның колагы, мин халкымның авызы...” “Мин халкымың акылы” дип әйтеп өлгегәнче телевизорны сүндереп куйдым.
* * *
Кеше үзенең кайчандыр бәхетле булганын бәхетсезлеккә тарыгач кына белә.
* * *
Морзалыкны кире кайтардылар. Хәзер эте дә, бете дә морза булып күренмәкче. Морза нәселе дип ялган таныклыклар да сатып алалар.
Шундыйларны:
– Эх, син морзавец! – дип сүгәсе килә.
* * *
Талантсызларның дошманы булмый. Алар үзләре талантлылар белән дошманлаша.
* * *
Ул йөк күтәрү түгел, сүз дә күтәрә алмый.
* * *
Бүген мин кичәгедән акыллырак, ә хискә кичәгедән ярлырак.
* * *
Шигырь – күңелнең кәгазьгә проекциясе.
Мөнир ВАФИН фотосы.