Марат КӘРИМОВ. Утырып уйлар уйладым (6)

Авылда җырлыйлар, зиратта елыйлар.

* * *

Әкияткә сюжет: бер дәүләттә эшсезлеккә каршы көрәшәләр. Һәркем эшләргә тиеш. Бер палач кына эшсез калган. Эшсез ятмасын өчен аңа корбаннар алып килеп торалар.

* * *

Китап укымаган милләт, милләт булудан туктый.

* * *

Хатын иренә мөкиббән. Ә анысы, әдәби итеп әйткәндә, кире герой. Аның кырын эшләрен хатынына җиткереп торалар, ләкин ул ышанмый. Мәхәббәтне сукыр диләр. Сукыр гына түгел, саңгырау да икән ул.

* * *

Әйбәт рифмалар безнең телдә бик күп: ыспайлыгы – өс байлыгы, фәстерүгә – гастрольгә, оратырлык – яратырлык, аңгыралар – каңгыралар... Шигырьнең сюжеты ничек булачагын алдан ук әйтеп торалар.

* * *

Гамьсез чагым – ямьсез чагым.

Мөнир ВАФИН фотосы.