Көзге юрамышлары

Теле ачылмаган баланы көзгегә каратсаң – теле озак ачылмаячак, акылга җиңел булачак.

Көзгегә карап ашасаң – ирең (хатының) көнче була.

Кояш баеганнан соң көзгегә карасаң – матурлыгың бетә, “йөз суың” китә, йөз нурың сүнә.

Кич (төнлә) көзгегә карасаң – гомерең кыска була.

Көзге төшеп ватылса – тормышың бозыла.

Югалткан көзгеңне табып алсаң – карама, ташла, бозым эләгүе бар.

Көзгең югалса – бозымнан саклану чараларын күр. Кемдер сине көзге аша сихерләргә мөмкин.

Юл чатыннан тапкан көзгегә карама – зәхмәт, авыру эләгер.

Суга, елгага, чишмәгә көзге ташлама – су алыр.

Карый торган көзгенне кояш астында калдырма – сипкел чыгар.

Карт-карчыклар йортындагы көзгегә карасаң – тиз картаясың.

Чибәр-күркәм кеше көзгесенә карасан – чибәрләнәсең.

Авыру кеше көзгесенә карасан – авырыйсың.

Үлгән кеше караган көзгеләрдән дә сакланырга кирәк – ул караган кечкенә көзгеләрне жыеп күмеп куярга да мөмкин.

Кеше үлгән (мәет кергән) йортта барлык көзгеләрне дә каплап куялар. Аларга үлем сурәте төшеп калырга, соңыннан башкаларга да күчәргә мөмкин.

Фото: freepik.com