Илнат ФӘРХУЛЛИН – Башкортстан кияве!

Ноябрь ахырында Уфабызда яшь, әмма популяр башкаручы Илнат ФӘХРУЛЛИНның концертлары гөрләп узды. Ике көн барган тамашада Яшьләр сарае җыр сөючеләр белән шыгрым тулы иде. Шунда ук Илнат үзенең Башкортстан кияве булып китүе турында хәбәр итте. Ул үзенең концерт группасындагы биюче Регина ГӘРӘЕВАга тәкъдим ясаган. Һәм моны меңгә якын тамашачы алдында, Казандагы концерты барышында башкарган. Регина шунда ук ризалык биргән.

 “Интертат” мәгълүмат агентлыгы хәбәр итүенчә, Регина ГӘРӘЕВА тумышы белән Башкортстан республикасының Дүртөйле районыннан. Ул – Башкортстанның атказанган артисты. Регина 15 ел дәвамында Фәйзи Гаскәров исемендәге дәүләт академия халык бию ансамблендә биюче булып эшләгән. Алар инде 2019 елдан бирле таныш булганнар. Һәм хәзер өч ел чамасы бергә концертлар куеп йөриләр. Аларга шушы вакыт эчендә шактый гына тормыш сынаулары аша да үтәргә туры килгән.

Шуны да әйтик, бу яшьләрнең беренче генә никахлары түгел. Алдагы никахыннан Регинаның Самир исемле улы үсә. Ә Илнатның инде ике улы бар. Балалар әти-әнисенең өйләнешү турындагы карарын тыныч кабул иткәннәр, каршылык белдермәгәннәр. Хәзер яшь пар туйга әзерләнә.

Фото: https://intertat.tatar