"Татар кызы" җиңүчесе

Тәтешле районының Шулган авылында туып үскән, М. Акмулла исемендәге БДПУны тәмамлаган Гөлназ Кашаева быелгы «Татар кызы-2026» республика бәйгесенең Башкортстан этабы җиңүчесе булды. Хәзер ул балалар бәйрәмнәрен оештыручы булып эшли, спорт, растяжка һәм биюләр белән мавыга. Әмма аның өчен иң мөһиме — милли рухны саклау.

Гөлназның башына Ак калфак куелгач, беренче уе: «Бу — минем буыннан килгән мирасым, ә хәзер ул минем кулда». Ул бу минутларны колакта яңгыраган гаҗәеп моңлы тавыш дип искә ала. Бу вакыйга аңа тик шәхси танылу гына түгел, бөтен милләтенең, гаиләсенең һәм укытучыларының хезмәте бәяләнгән мизгел дә булган.

Ул көнне нинди сүз белән сурәтләргә мөмкин дигән сорауга кыз бер генә сүз сайлый: — «Тормыш», — ди ул. — Чөнки бу көн минем өчен яңа сулыш, яңа мәгънә, яңа юл ачты.

Конкурска гариза бирү озак еллар дәвам иткән хыял нәтиҗәсе булган. Бер мизгелдә Гөлназ үзенең көчле якларын күрсәтә алуын һәм милләтенә булган мәхәббәтен чагылдыру мөмкинлеген аңлап алган. Шунда ук «Хәзер яки беркайчан да түгел» дигән катгый карар кабул иткән.

Күпләр мондый конкурслар бары тик тышкы матурлыкка кайтып кала дип уйласа да, Гөлназ бу стереотипны җимерергә тели. Аның фикеренчә, татар кызы — ул акыл, белем, рухи байлык, милләтне хөрмәт итү һәм заман белән бергә атлап, әдәп-әхлакны саклау. — Мин күрсәтергә телим: татар кызы — ул стильле, белемле, үз фикере булган, ләкин үзенең тамырларын онытмаган шәхес, — диде җиңүче.

Алда — финал. Башкортстанның күпмилләтле вәкиле буларак сәхнәгә чыгу Гөлназда зур җаваплылык хисе уята. Ул анда татар кызы буларак кына түгел, ә барлык милләтләрнең дуслыгы, татулыгы һәм уртак мәдәни байлыгы символы булып торачагын аңлый. — Бу — минем өчен тагын бер дәрәҗә, һәм мин аны горурлык белән күтәрергә әзер, — ди ул.

Финалда уңыш ничек билгеләнәчәк? Гөлназ өчен төп критерий — җиңү түгел. Иң мөһиме — тамашачыларга, жюрига һәм үз-үзенә гадирәк, ихласрак булып калу. — Миңа үзем булып калу — гади, чын, ихлас Гөлназ булып чыгыш ясау мөһим. Җиңү — ул матур нәтиҗә, әмма минем өчен төп максат — кешеләргә «Татар кызы — ул көч, матурлык, акыл һәм мәхәббәт берлеге» икәнен күрсәтү. Үз мөмкинлекләремне тулысынча ачу, куркуларны җиңү — менә минем өчен чын уңыш шушы, — дип ассызыклады Кашаева.