Татар теле һәм әдәбиятыннан республика күләмендәге олимпиада нәтиҗәләре.

Татар теле һәм әдәбиятыннан республика күләмендәге олимпиадада Эльзана Бәдретдинова 100 баллдан 100 балл җыйган!

Эльзана–Туймазы районы Илчембәт авылы кызы. Туймазы шәһәренең беренче санлы интернат-мәктәбенең 11нче сыйныф укучысы.

Кызыкайның бу беренче генә олимпиадасы түгел. Ул ел саен мондый чараларда катнашып килә һәм алар укытучысы Зинфира Гаднән кызы Нурисламова белән берлектә елдан ел яхшырак нәтиҗәләр күрсәтәләр.

"Олимпиадага килгәндә биремнәр җиңелләрдән булмады, үткән елга караганда авыррак булды. Кайбер җавапларымда икеләндем, минем бәхеткә, алары да дөрес булган. Көндәшләрем дә шатландырды, аларның белемнәрен минекеннән начаррак диеп булмый, алар белән ярышу күңелгә дәрт өстәде. Телебезне әйбәт белгән кешеләр арасында иң яхшысы булу канатландыра. Без укытучым белән ныклап әзерләндек, нәкъ шул әзерләнүем өчен, көн саен күбрәк белү теләгем булганы өчен җиңүне мин яулаганмындыр дип уйлыйм"-, диде Эльзана.

Иң мөһиме, кызыбыз үз белемендә шикләнмәгән. Аның туган телгә, татар әдәбиятына булган мәхәббәте, телебез, мәдәниятебез, тарихыбыз белән ихластан кызыксынуы бу бәйгедә җиңеп чыгу өчен ныклы терәк булды.

Олимпиаданың оештырылу дәрәҗәсе дә югары булды бу елны. Катнашучылар яхшы нәтиҗә күрсәтсен, аларның максатлары чынга ашсын, җиңү дәртен арттыру өчен бөтен шартлар да каралган иде. Беренче көнне биремнәр эшләнде, олимпиада тәмамлангач, катнашучыларны концерт программасы белән дә шатландырдылар. Икенче көнне җиңүчеләрне бүләкләү тантанасы үтте. Төп җиңүчедән башка тагын 5 кеше призерлы урыннар яулады.