Стәрлетамак белән Авыргазы алдан бара

Башкортстанда 1,2 млн тоннадан артык иген җыеп алынган да инде.

Башкортстанда ашлыкның тулай җыемы 1,2 млн тоннадан артып китте. Бу хакта Башкортстан башлыгы үз социаль челтәрләрендә хәбәр итте.

Республикада бөртекле һәм кузаклы культуралар мәйданының өчтән береннән артыгы суктырылган. Уҗымнарны җыю төгәлләнеп килә. Авыл хуҗалыгы һәм азык-төлек министрлыгы мәгълүматлары буенча, алдынгылар арасында -- Стәрлетамак һәм Авыргазы районнары хуҗалыклары, алар 80 мең тоннадан артык ашлык җыйганнар.

«Быел һава шартларының катлаулы булуына карамастан, яхшы уңыш алырга өметләнәбез. Республика икмәксез калмас», -- дип яза Радий Хәбиров.

Гомумән алганда, быел 3 млн тонна уңыш җыеп алыныр, дип көтелә.