Киләчәк һөнәре

"Цифрлы икътисад" илкүләм проекты һәм РФ Цифрлы үсеш, элемтә һәм массакүләм коммуникацияләр министрлыгы Русия укучылары өчен программалауга өйрәтүнең яңа бушлай ике еллык курсларын башлап җибәрә.

«IT-тармакның кадрлар потенциалын үстерү» федераль проекты ярдәмендә инде бу көздә 8-11 сыйныф укучылары «Киләчәк коды» проектында катнаша алачак.

Узган уку елында дәүләт ярдәме хисабына 10 меңнән артык укучы программалаштыру онлайн-курсларында бушлай белем ала алган инде.

«Университет 2035» цифрлы платформасы гамәлгә ашырган пилот проектын илнең ун төбәгендә: Белгород, Новгород, Калуга, Тула, Оренбург, Түбән Новгород, Пенза өлкәләрендә, шулай ук Башкортстанда, Татарстанда һәм Якутиядә эшләтеп җибәрделәр.

Тугыз белем бирү оешмасы балаларга Python, C#, Java, PHP, C һәм JavaScript кебек программалау телләрен өйрәнергә тәкъдим итте. Эксперимент шундый уңышлы булып чыкты, быелдан аны бөтен илгә киңәйттеләр.