Бәләбәйдә измә-бетон җайланмасы

Башкортстан Республикасының Бәләбәй шәһәрендә «Стройснабмастер» компаниясе «Кече һәм урта эшмәкәрлек» илкүләм проекты ярдәмендә алган җир кишәрлегендә тимер-бетон эшләнмәләр җитештерүне башлап җибәргән. Бу хакта Бәләбәй районы администрациясе хәбәр итә.

«Стройснабмастер» --  социаль-икътисадый үсеш территориясе резидентларының берсе. Компания 41 эш урыны булдырырга мөмкинлек бирәчәк инвестицион проектны гамәлгә ашыра.

Шушы көннәрдә монда Златоусттан кайтартылган, сәгатенә 26 кубометр продукция җитештерү куәтенә ия измә-бетон җайланмасын эшләтеп җибәргәннәр. Анда тимер-бетон измә, свайлар һәм плитәләр җитештерелеп, шәһәрнең төзелеш оешмаларына, шулай ук шәхси клиентларга сатыла башлаячак.