Коронавируслы мәзәкләр

Коронавируслы мәзәкләр

Кытай фәлсәфәсе: бер кеше дөньяны үзгәртә диюгә ышанмыйсыз икән, димәк, сез пешеп җитмәгән ярканат ашамагансыз.

* * *

– Коронавирус юк! – дигән аңа ышанмаган Вәли.

– Вәли юк! – дигән бер айдан коронавирус.

* * *

Бүгенге чорның психик атакасы – солдатлар дошман алдына килә һәм төчкерергә тотына.

* * *

– Коронавирустан куркасызмы?

– Юк, минем кредитым бар. Үләргә ирек бирмәячәкләр.

* * *

Иң акыллы кешеләр 70 процент ил байлыгына ия. Иң юләрләр – илнең 70 процент туалет кәгазенә.

* * *

Кыйммәтле кәгазьләр базарында иң алда – туалет кәгазе.

* * *

Хастаханәдә.

– Коронавирустан шикләнелгән кеше ничек?

– Әйбәт. Үзенә аерым палата, махсус ашату.

– Нәрсә ашатасыз?

– Печенье. Башка азык идән белән ишек арасындагы ярыкка сыймый.

* * *

Киемнәр генә түгел, үлем дә Made in China булала икән.

* * *

– Мәскәүдә үзизоляция тәртипләрен бозмаучы кеше ачыкланды.

– Кем ул?

– Мавзолейдагы Ленин.

* * *

Бер тапкыр кулланыла торган медицина битлеген ким дигәндә атнасына ике тапкыр юарга кирәк.

* * *

Төнлә куркыныч районнарда йөрергә туры килгәндә иң яхшысы ютәлләп, төчкереп атлау.

* * *

– Әти, динозаврлар нигә үлеп беткән?

– Чөнки алар самоизоляция тәртипләрен үтәмәгән.

* * *

Эпидемия вакытында карабодай, имбир, битлеккә хак артты, хоккейчылар һәм футболчыларга төште.

* * *

Бию ансамбленә таба шуышкан вирус бик тиз тапталып мәрхүм булган.