Җырчы МакSим – комада

Татарстанда туып, Русия эстрадасында “Знаешь ли ты” җыры белән танылу яулаган Марина Амбросимова – МакSимның хәлләре бик мөшкел. Үзенең температурасы күтәрелүен җырчы 11 июньдә үк тойган. Шунда ук коронавируска ПЦР-тест үткән. Тест кире нәтиҗә биргән. Русия көне – 12 июньдә МакSим Казанда ачык һавадагы бәйрәм концертында чыгыш ясаган. Сәхнәгә ул 39,7 температура белән чыккан.

Мәскәүгә кайту белән җырчы икенчегә ПЦР-тест тапшырган. Анысы да авыру юк дип күрсәткән. Хәле туктаусыз начараюга барган җырчы моннан бер атна элек госпитализацияләнгән. Компьютер томографиясе аның үпкәләренең 40 проценты ялкынсынуын күрсәткән. Ә өченче тапкыр үткәрелгән ПЦР-тест җырчыны янә сәламәт дип күрсәткән.

Бөтенләй тын ала алмаган җырчыны үпкәне ясалма җилләтү аппаратына (ИВЛ) тоташтырганнар. Тик бу да файда бирмәгән. 19 июньдә табиблар җырчыны ясалма комага – медикаментоз йокыга керткәннәр. Әлегә кадәрМакSим шул хәлдә кала. Аның организмы. эчке органнарының торышы алдагы дәвалау ысулларын билгеләү өчен табиблар тарафыннан җентекләп өйрәнелә.

Фото: pressite.ru