Су басу куркынычы арта

Бүген, Башкортстанда ташкын проблемасы буенча брифинг узды. Гадәттән тыш хәлләр буенча Дәүләт комитеты башлыгы Фәрит Гомәров сүзләренә караганда, хәзерге вакытта тау елгалары әлегә югары ноктасына кадәр артмаган. Инҗәр елгасында гына катлаулы хәл күзәтелә. Анда шартлаткыч төркем кизү тора, алар тыгылган бозларны шартлатырга әзер. Кичә Башкортстанның Белорет районында тыгынны сигезенче тапкыр шартлатуда гына бетерә алганнар.

14 апрельдә Уфа территориясендә югары әзерлек режимы кертелүе турында хәбәр пәйда булды.

Бүгенге көнгә 13 муниципаль оешма территориясендә 31 торак йорт, 272 йорт яны участогы, 11 автомобиль юлы һәм 2 күпер контрольдә тотыла. Су астында калган торак йортларда 566 кеше яши. Шуларның 73е балалар.

Фото: mkset.ru