Камчаткада ни хәлләр?

Коронавирус эпидемиясенә каршы тору Владимир Солодов өчен Камчаткага билгеләнгәннән бирле төп бурыч иде. Вәзгыять бик авыр булган, май ахыры буенча көн саен 70 госпитализация теркәлгән. Буш койкалар булмаган диярлек, һәм медицина кадрлары кытлыгы туган.

Бу бурычны хәл итү өчен барлык көчләр дә мобилизацияләнгән. Җиде госпитальдә 816 ятак җәелдергәннәр, алар кирәкле җиһазлар белән тәэмин ителгән. Тестлар күләмен ике атна эчендә 20 тапкырга диярлек арттырганнар, бу параметр буенча Камчатка ил буенча лидерларның берсе булып кала. Нәтиҗәдә, эпидемия барышы сүлпәнләнгән.

Шул ук вакытта инфекция Камчатка краенда сәламәтлек саклау системасының хәерче хәлдә булуын бик кискен яктырткан, бу бигрәк тә таушалган инфраструктурага кагыла. Мәсәлән, төп учреждение – Камчатка край хастаханәсе – 50-70 нче елларда төзелгән, бер-берсеннән аерым торучы унбер бинада урнашкан. Алар 90 процентка кадәр тузган. 2003 елда ук бу биналар тиешле сейсмик куркынычсызлыкка туры килми дип танылган, һәм аларда пациентларның булуы яшәү һәм сәламәтлеккә куркыныч тудыра. Моннан тыш, биредә яңа җиһазлар урнаштыру һәм Сәламәтлек саклау министрлыгы биргән рекомендацияләргә туры китереп дәвалау мөмкин түгел, димәк, заманча сыйфаттагы медицина хезмәтләре күрсәтеп булмый.

Яңа хастаханә төзүне Камчаткада яшәүчеләр инде 15 елдан артык көтәләр. Проектланган яңа комплекс заманча медицина кластеры булырга тиеш, ул дәвалау-диагностика корпусын да, палата корпусын да, барлык төп чараларны күрсәтү мөмкинлеген дә үз эченә алачак. 2013 елдан хастаханә төзелеше башланган, һәм миллиард сумнан артык акча юнәлдерелгән. Әмма, кызганычка каршы, узган елдан акча җитмәү сәбәпле төзелеш туктатылган. Хәзер гомуми ихтыяҗ 8,4 миллиард сумга бәяләнә. Губернатор В.Путиннан бу мәсьәләдә ярдәм үтенде.