Сәламәтлек өчен акча мулдан бүленә

Башкортстан узган ел 17,5 миллиард сумнан артык медицина җиһазы сатып алган. Мондый саннарны  республика Хөкүмәте премьер-министры Андрей Назаров белдерде, ул 2022 елда Хөкүмәтнең эш нәтиҗәләре буенча БР Дәүләт җыелышы-Корылтай депутатлары алдында хисап белән чыгыш ясады. Аның сүзләренә караганда, республикага елына 299 берәмлек санитар автотранспорт җибәрелгән.

— Бу безгә тузган медицина автопаркының 36 проценттан артыгын яңартырга мөмкинлек бирде, — дип билгеләп үтте Андрей Назаров. Шул ук вакытта Башкортстан хастаханәләре автопаркын яңарту быел да дәвам итә. 20 мартта, БР Башлыгы администрациясе җитәкчесе Максим Забелин төрле модификациядәге 65 яңа санитар автомобиль ачкычын республиканың 37 шәһәре һәм районы хастаханәләренең һәм поликлиникаларының баш табибларына тапшырды.

14 ашыгыч ярдәм машинасы медицина ярдәме күрсәтү һәм ашыгыч авыруларны ташу өчен кирәкле барлык җиһазлар белән җиһазландырылган. Ашыгыч ярдәм автомобильләре дефибриллятор, ЭКГ теркәү мөмкинлеге булган электрокардиограф, портатив пульсоксиметр, идарә ителә торган һәм ярдәмче ясалма үпкә вентиляциясе аппараты, канда глюкоза концентрациясен экспресс-үлчәүче һәм башка медицина җиһазлары белән җиһазландырылган. Башкортстанның медицина автопаркы шулай ук LADA Granta базасында 40 яхшы җиһазландырылган автомобиль белән тулыландырылган.

Әлеге эшләр Русия Президенты Владимир Путин кушуы буенча эшләнгән гомумдәүләт проектына ярашлы башкарыла.