Туймазыда "Кванториум"

 Башкортстанның Туймазы шәһәрендә 1нче мәктәп-интернат базасында "Мәгариф" илкүләм проекты ярдәмендә "Кванториум" балалар технопаркы ачылачак. Бу хакта Туймазы районы администрациясе хәбәр итә.

Мондый технопарклар әлегә Стәрлетамакта һәм Салаватта бар. «Кванториум»  югары технологияле җиһазлар белән җиһазланган. Анда актуаль фәнни-тикшеренү һәм инженер-техник юнәлешләр буенча укыту-тәрбия эш барырга мөмкин. Һәм биредә балаларның сәләтен үстерү өчен уникаль мохит формалаша. Балаларны инженерлык белеменә генә түгел, проект эшчәнлегенә дә, ТРИЗ (уйлап табу бурычларын хәл итү теориясе), 4К-компетенцияләргә (коммуникация, креативлык, проект бурычларын команда белән хәл итү, тәнкыйди фикерләү) һәм реаль җитештерү бурычларын тәэмин итәргә дә өйрәтәчәкләр.