Стәрлебаштан профессиональ футболчылар чыгармы?

Узган елның сентябрь аенда Стәрлебаш авылында “Атлантис” Стәрлетамак балалар футбол клубының филиалы ачылды. Бүген биредә 81 кечкенә футболчы тәрбияләнә. Алар атнасына өч тапкыр Стәрлебашның 2 нче мәктәбендәге спорт залына килеп, яраткан уен төре белән шөгыльләнәләр. Клубка нигез салып, бүген аның баш тренеры булган Александр Нечаев җитәкчелегендә алар өчкә – башлангыч, урта һәм өлкән төркемнәргә бүленеп, футбол серләрен үзләштерәләр. Стәрлебаш футболчылары Уфа һәм Салават шәһәрләрендә узган күчмә турнирларда да катнашып өлгергән инде. Яшьтәшләреннән аермалы буларак, алар смартфон-айфоннар артында утыруга караганда, хәрәкәтле уеннарга өстенлек бирәләр. Дәрестән тыш вакытлары да бушка узмый – сәламәтлекләрен ныгыталар.

Остазлары Александр Нечаев сөйләвенчә, “Атлантис” клубы 2018 елда Стәрлетамак шәһәрендә оешкан. Бүген аның төрле районнарда тугыз филиалы бар. Шуларның бишесе – Стәрлетамак шәһәрендә, калганнары Олы Куганак, Рощинский, Стәрлебаш һәм Федоровка районнарында урнашкан. Балаларны профессиональ футболчылар тәрбияли. Әлеге эш “Демография” гомумдәүләт проектының “Спорт – яшәү нормасы”федераль программасы буенча алып барыла.

Димәк, тиздән республика башкаласындагы “Уфа” футбол клубы яңа көчләр белән тулыланыр дигән өмет бар. Юкса, соңгы вакытта ул спорт сөючеләрне бер дә шатландырмый...

Чыганак: Башкортстанның Стәрлебаш районы хакимияте, https://srk.nationalpriority.ru/press_releases/233526