Марат КӘРИМОВ. Утырып уйлар уйладым (5)

* * *

Язучылар дачасы – “Аклан”. Кайбер язучылар умарта да тота. Берчак үтеп барганда Зөлфәр Хисмәтуллинны корт чага. Әмәлгә калган кебек, дача хуҗасына тап була.

– Зәйнәп апа, кортың чакты бит әле. Менә күзем шешеп чыкты, – ди Зөлфәр.

– Булмас-булмас. Минем кортлар үзем кебек юашлар. Сине  Яныбай Хамматовның кортлары чаккандыр, – дип җаваплый Зәйнәп Биишева. – Мал иясенә охшый бит ул.

Зәйнәп апаның “юашлыгын” кем генә белми инде.

* * *

Эзләгәндә иҗат үзе килә.

* * *

Артист З-га концерт саен чәчкә бүләк итәләр. Бервакыт аңа дүрт букет тапшыралар.

 – Ә бишенчесе кая? – ди ул аптырап.

Баксаң, ул букетларны үзе сатып ала икән.

* * *

Бәлагә тарыдым... Арыдым... Арыдым...

* * *

Мөселманнарда корбан чалу йоласы бар. Гадәттә, күбрәк сарык чалалар. Большевиклар чын мөселманнар булып чыкты. Алар намусында әллә ничә миллион корбан.

* * *

Йорт ишеге ачык булу – күңел ишегенең ачык булуына бәйле.

* * *

Эчәләр, эчәләр, аннан зиратка күчәләр.

Мөнир ВАФИН фотосы.