Өермә алып киткән

Безнең Бүздәк районы Күзәй авылында Саҗидә исемле бер әби бар иде. Ул гел урам буйлап, кешедән-кешегә кереп: “Менә яңгыр яудырдым әле, зиратка барып, дога кылдым да яңгыр теләдем – менә яуды”, – дип сөйләп йөри иде. Кешеләр аны ашатып-эчертеп чыгаралар, хәер дә бирәләр. Һәм әби аларга рәхмәт әйтеп, Ходайдан яңгыр сорармын, дип китә иде.

Авыл халкы ул әби хакында болай дип сөйли: “Саҗидә бәләкәй чагында өермәгә эләккән. Кечкенә вакытында ул акылга камил, матур кыз бала булган. Шушы өермәгә эләккәч, ул акылга җиңеләйгән. Аның каравы, Саҗидәдә яңгыр яудыру сәләте барлыкка килгән, ди”.

Фото: zagadki-dlya-detej.ru