Уфа «Нур» театры Мәскәүдә уңышлы чыгыш ясады

2 майда Евгений Вахтангов исемендәге легендар театрның төп сәхнәсендә «Алтын битлек» XXXII  премиясе номинациясендә  «Тау» спектакле күрсәтелде. Уфа «Нур» татар дәүләт театры башкала тамашачысына мәхәббәт, тугрылык һәм хәтер турында  драма тәкъдим итте.

Зал тулы иде: Мәскәү тамашачылары билетларны вакыйгага кадәр үк сатып алып бетергән. Мәскәү татар җәмәгатьчелеге  вәкилләренең күбесе якташларын хупларга дип килгән. Тамашачылар спектакльне ихлас кызыксыну һәм җылылык белән каршы алды. Куелышның финалы хисләр давылын уятты — зал берничә минут басып кул чапты. Артистлар сәхнәгә рәхмәтле тамашачылар чыгарган чәчәкләр һәм бүләкләр диңгезенә чумды.

Башкортстанның һәм Татарстанның РФ Президенты каршындагы Даими вәкиллекләре катнашу кичәнең әһәмиятен бермә-бер арттырды,  вакыйганың югары статусын, ике төбәк мәдәниятенең бердәм омтылышларын ассызыклады. Башкортстанда туып-үскән әдип Илдар Юзеев әсәре мотивлары буенча сәхнәләштерелгән спектакль Казаннан яшь һәм талантлы режиссер Айдар Җәббаров һәм «Нур» театры труппасы көче белән иҗат ителгән.

«Тау» инде тамашачыга үзенең йогынты көчен исбатлады. Хәзер «Нур» театры дулкынлану һәм өмет белән «Алтын битлек» премиясенең жюри карарын көтә.

Исегезгә төшерәбез, XXXII премия лауреатларын бүләкләү тантанасы 2026 елның июнендә Омскида узачак.

«Без җиңүгә өметләнәбез һәм спектакльнең югары профессиональлеге һәм рухи көче  экспертлар тарафыннан лаеклы бәяләнер, дип ышанабыз», - ди алар.

Алина Сабитова.

Автор фотолары.