Башкортстанда XXXVI Халыкара Аксаков бәйрәме узачак

Халыкара Аксаков бәйрәме күптән инде Башкортстанның гына түгел, бөтен Русиянең мәдәни тормышындагы күренекле вакыйгаларның берсенә әверелде. Ул Аксаковлар гаиләсенең бай рухи һәм әдәби мирасын популярлаштыруга, мәдәни традицияләрне саклауга, яшь буында тарихи хәтер һәм Ватанга мәхәббәт тәрбияләүгә хезмәт итә. Быел Уфага Болгария, Сербия, Германия, Финляндиядән, шулай ук Мәскәү, Санкт-Петербург, Луганск, Ульяновск, Самара, Оренбург һәм башка шәһәрләрдән язучылар, журналистлар, галимнәр, әдәби музейлар җитәкчеләре һәм җәмәгать эшлеклеләре киләчәк.

Бәйрәмнең беренче көне – 25 сентябрьдә Уфаның белем бирү учреждениеләрендә традицион «Аксаков дәресләре» белән башланачак. Идел буе дәүләт су транспорты университетының Уфа филиалында Намус дәресе үткәрелеп, анда адмираллар, генераллар һәм җәмәгать эшлеклеләре беренче курс студентларына студент билетлары тапшырачак. Аксаков гимназиясендә исә язучылар, публицистлар һәм музей хезмәткәрләре укучылар белән традицион гаилә һәм әхлакый кыйммәтләр турында фикер алышачак.

Башкортстан Республикасы Башлыгы каршындагы Башкортстан дәүләт хезмәте һәм идарә академиясендә Санкт-Петербург, Мәскәү, Оренбург һәм Уфа галимнәре катнашлыгында Иван Аксаков мирасына багышланган түгәрәк өстәл уздыру да каралган.

Бәйрәм чаралары С. Т. Аксаковның мемориаль йорт-музеенда дәвам итәчәк. Биредә «Аксаков һәм рус язучылары» күргәзмәсе ачыла. Ул әдипнең үз чорындагы күренекле каләм әһелләре белән шәхси һәм иҗади бәйләнешләре турында сөйләячәк. Музейның Әдәби кунакханәсендә «Наш современник» журналы һәм «Дворянский род Нагаткиных. Путь сквозь столетия» китабы тәкъдим ителәчәк.

Уфаның С. Т. Аксаков исемендәге бакчасы да бу көнне зур бәйрәм мәйданына әвереләчәк. Биредә иҗат коллективлары чыгышлары, балалар рәсемнәре күргәзмәсе, халык иҗаты осталары эшләнмәләрен сату-күргәзмәсе оештырылачак, уен мәйданчыклары һәм фотозона эшләячәк.

Кич белән Башкорт дәүләт опера һәм балет театрында – тарихи Аксаков халык йортында – тантаналы Аксаков кичәсе үтәчәк. Аның төп вакыйгасы – С. Т. Аксаков исемендәге Бөтенрусия әдәби премиясен һәм Григорий Аксаков орденын тапшыру. Тантана сәнгать осталары концерты белән тәмамланачак.

26 сентябрьдә бәйрәм республика районнарына күчә. Аксаковлар тарихы белән бәйле Бәләбәй, Уфа һәм Кырмыскалы районнарында төрле мәдәни чаралар үткәрү планлаштырылган.

Шулай итеп, ике көн дәвам итәчәк XXXVI Халыкара Аксаков бәйрәме әдәбиятны, тарихны һәм гаилә традицияләрен берләштергән зур мәдәни вакыйга булачак. Быел ул бөек язучы Сергей Аксаковның 235 еллык юбилеена багышлануы белән аеруча әһәмиятле.

Елена Петрова фотосы.

Чыганак: https://belizvest.ru/