Башкорт дәүләт аграр университетының 1700 студенты кырларга юллана!

Университет студентлар отрядлары арасында махсуслашкан «Колос» отряды аерым урын тота. Ул берничә ел дәвамында Башкортстанда гына түгел, илнең аграр югары уку йортлары арасында да алдынгы позицияләрен саклый. Отряд әгъзалары авыл хуҗалыгының төрле юнәлешләрендә тәҗрибә туплый: заманча югары технологияле техникада эшли, терлекчелек һәм ветеринария өлкәсендә хезмәт куя, үсемлекчелек һәм авыл хуҗалыгы продукциясен эшкәртү белән шөгыльләнә.

Хезмәт сезоны башланганчы студентлар Русия студентлар отрядлары белән берлектә эшче һөнәрләренә бушлай укый. Бу аларга производствога әзерлекле килергә, техника һәм җиһазлар белән хәвефсез эшләргә, сайлаган тармакларының үзенчәлекләрен практикада үзләштерергә мөмкинлек бирә.

Быел булачак аграр белгечләр арасында Липецк өлкәсендә гамәлгә ашырылган «Агроном-сад» проекты аеруча зур кызыксыну уята. Алма җитештерү буенча алдынгы предприятиеләрнең берсе җәйге сезонда Русиянең төрле төбәкләреннән 900ләп студентны кабул итәчәк.

Предприятие җитәкчелеге билгеләвенчә, сезонлы хезмәт яшьләр өчен җитди һөнәри юлның башлангычы булырга мөмкин. Заманча авыл хуҗалыгында ясалма интеллект, төгәл игенчелек технологияләре һәм автоматлаштырылган системалар киң кулланыла. Шуңа күрә бүгенге аграр белгечтән җирне ярату гына түгел, ә яңа техника һәм санлы технологияләр белән эшли белү дә таләп ителә.

Проектта катнашучылар уңыш җыюда эшләячәк, продукциягә химик анализ үткәрәчәк һәм алмаларны тракторларда ташыячак. Күпләр өчен бу акча эшләү мөмкинлеге генә түгел, ә киләчәктәге эш урынын сайлау, предприятие белән якыннан танышу һәм үзен чын производство шартларында сынап карау булачак.

БашДАУ студентлар отрядлары штабы җитәкчесе урынбасары Тимур Рәхмангулов быел беренче тапкыр «Колос» составында аграр хезмәттә катнашачак.

– Иртән бик иртә торырга туры киләчәк, шуңа күрә бу сезон чын сынау булыр дип уйлыйм, – ди ул.

Моңа кадәр Тимур пассажир вагоннары проводнигы булып биш рейс ясарга өлгергән. Әмма җир белән бәйле хезмәт аны ныграк җәлеп иткән. Киләсе елда ул илнең башка төбәкләрен күрү өчен балык тоту сезонына барырга да планлаштыра.

Студентларның төп максаты – аудиториядә генә үзләштереп булмый торган практик күнекмәләр алу, яңа кешеләр белән танышу һәм реаль икътисад өчен җаваплылык хисен тою. Хезмәт семестры яшьләргә үз һөнәрләрен тирәнрәк аңларга, мөстәкыйльлеккә өйрәнергә һәм булачак карьералары өчен беренче ныклы адымнарны ясарга ярдәм итәчәк.

Фото: Эльзана Такиуллина.