Җиде мең сум өчен ике ел төрмә

Салават шәһәрендә бер ир-ат җиде мең сумлык махинациясе  аркасында төрмәгә китәчәк.

Республика прокуратурасы матбугат хезмәтендә хәбәр итүләренчә, узган елның мартында ул социаль челтәрләрдә автомобиль өчен запас частьләр сатуы турында белдерү бастырган. Чынлыкта исә аның бернинди комплектлаучы детальләре дә булмаган.

Аңа климат-контроль экранын җиде мең сумга сатып алырга теләгән сатып алучы мөрәҗәгать иткән. Клиент акчаны счетка күчергән.

Аларны хөкем ителүче үзе теләгәнчә сарыф иткән.

Гаепләнүче үз гаебен таныган, элегрәк инде мошенниклык өчен хөкем ителгән булган.

Суд аңа катгый режимлы төзәтү колониясендә ике елга ирегеннән мәхрүм итү  рәвешендә җәза билгеләде.

Фото: Freepik.