Уфалыларны «Музейлар төне»нә чакыралар

Уфадагы «Русия – минем тарихым» тарихи паркында «Музейлар төне» акциясе узачак. Быелгы чара «Туган як» шигаре астында үтә һәм Русия халыклары бердәмлеге елына багышлана.

Оештыручылар билгеләвенчә, проект шәһәр халкына һәм кунакларга туган төбәк тарихына яңача карарга, аның бай мәдәни мирасы белән якыннанрак танышырга мөмкинлек бирәчәк.

Кич буе паркта тематик экскурсияләр оештырылачак. Алар арасында Башкортстанның борынгы фотоларына багышланган махсус программа да бар. Кунаклар атаклы фотограф Сергей Прокудин-Горский төшергән тарихи кадрлар аша төбәкнең үткәненә сәяхәт итә алачак. Шулай ук башкортларның Рус дәүләте составына керү тарихы, Уфа шәһәре үсеше турында да сөйләячәкләр.

Моннан тыш, чара кысаларында «150 артист. Театр эшлеклеләре берлеге» күргәзмәсе эшләячәк. Ул театр сәнгатенең тарихын һәм күренекле артистлар иҗатын чагылдыра.

Программа мәдәният белән генә чикләнми. Килгән кунаклар өчен милли сувенирлар һәм башкорт саклагычлары ясау буенча мастер-класслар, театр сәнгате һәм импровизация дәресләре дә үткәреләчәк.

Барлык мәйданчыкларга керү бушлай, әмма алдан теркәлү кирәк. Чаралар 16:00дән 22:00гә кадәр дәвам итәчәк.

Чыганак: https://mgazeta.com/