«Тоталь диктант–2026»: белемеңне тикшер!

2026 елның 18 апрелендә Башкортстан халкы янә «Тоталь диктант» халыкара белем акциясенә кушылачак. Бу чара ел саен меңләгән кешене берләштерә, һәм быел да ул мәктәп укучыларыннан алып укытучыларга, студентларга, эшмәкәрләргә кадәр барлык теләүчеләрне бер мәйданга җыяр дип көтелә.

Әлеге акция – гади диктант кына түгел. Ул – грамоталылыкны тикшерү, телгә карата игътибарны арттыру, үз-үзеңне сынау һәм зур белем хәрәкәтенең бер өлеше булу мөмкинлеге.

Оештыручылар инде катнашучылар өчен теркәлүне ачты. Моның өчен акциянең рәсми сайтына кереп, үзегезгә уңайлы мәйданчык сайларга мөмкин. Уфада диктант 13:00 сәгатьтә башланачак. Шулай ук Салават, Стәрлетамак, Нефтекама, Бөре, Мәләвез, Ишембай, Туймазы кебек шәһәрләрдә дә язма үткәреләчәк.

Өйдән чыкмыйча катнашырга теләүчеләр өчен онлайн-формат та каралган – диктантны 18 апрель көнне теләсә кайсы вакытта язарга мөмкин булачак.

«Тоталь диктант» тарихы да кызыклы: ул 2004 елда Новосибирск дәүләт университеты студентлары башлангычы белән башланып китә. Бүген инде бу акция дөньякүләм дәрәҗәгә күтәрелде: 2025 елда ул 112 илне колачлап, 1,3 миллионнан артык кешене берләштерде.

Оештыручылар ассызыклаганча, диктант – ул кагыйдәләрне тикшерү генә түгел, ә телләрне саклау, мәдәни күптөрлелекне ныгыту юнәлешендә дә әһәмиятле адым. Катнашу тулысынча бушлай, ирекле һәм аноним рәвештә үткәрелә.

Шуңа күрә, әгәр син үз белемеңне сынап карарга, телгә карата игътибарыңны арттырырга һәм зур белем хәрәкәтенең бер өлеше булырга телисең икән – 18 апрельне билгеләп куй. Бу мөмкинлекне кулдан ычкындырма!

Источник: https://mgazeta.com/