Дәүләкән районында коточкыч фаҗига!

Фаҗига ике катлы торак йорт фатирында була. "Башинформ" мәгълүмат агентлыгы хәбәр итүенчә, беренчел мәгълүматлар буенча, балаларның әнисе, 33 яшьлек хатын-кыз, урындагы барга эшкә киткән. Аның 7 яшьлек кызы,  5 яшьлек ике игезәк кызы һәм 3 яшьлек ике игезәк улы аның  33 яшьлек тормыш иптәше карамагында калган.

Төнлә, барысы да йоклаганда, розеткадан янгын пәйда булып, әйберләр һәм асылмалы  түшәмгә үрләгән. Нәтиҗәдә фатирда әче төтеннән сулыш алырга мөмкинлек калмаган. Балалар да, ирләр дә уяна алмый җан биргән.

Күршеләре, төтен исен тоеп, фатир эченә керә алган. Алар  килеп кергәндә бүлмәдә  зур диванда биш бала һәм ир-ат яткан, аларда инде яшәү билгеләре булмаган. Җыелган кешеләр кул астындагы чаралар белән янгынны сүндергән.

Әлеге фатир балаларның әнисе тарафыннан Ана капиталы акчасына сатып алынган булган. Аның Уфада әтиләре белән яшәүче тагын өч баласы бар. 

Башкортстан башлыгы Радий Хәбиров социаль челтәрләрдә бу вакыйгага үз мөнәсәбәтен белдерде: "Мондый хәл турында сөйләү һәрвакыт авыр. Бүген төнлә Дәүләкән районында янгында биш кечкенә бала һәм ир-ат һәлак булды. Фатирда янгынкисәткеч булган, аның сигналын ишеткәннәр, янгынны сүндергәннәр. Әмма, кызганычка каршы, соң булган", — дип яза  Башкортстан Башлыгы. "Янгынның сәбәпләре тикшерелә — барлык хезмәтләр дә урында, —  дип өсти ул. — Балаларның әниләре белән психологлар эшли. Вәзгыятьне контрольдә тотабыз һәм, һичшиксез, барлык кирәкле ярдәмне күрсәтәчәкбез. Якыннарының кайгысын уртаклашам. Барыгызга да зур үтенеч: зинһар, үзегезне, якыннарыгызны саклагыз".

Чыганак: Башинформ.