Чәчү экваторга якынлаша

Башкортстанда чәчү эшләренең яртысыннан күбрәге инде тәмамланган. Бу хакта үз социаль челтәрләрендә Республика Башлыгы Радий Хәбиров хәбәр итте. Аның сүзләренә караганда, бүгенге көнгә игенчеләр сабан культураларының 51,4 процентын чәчкәннәр. Бу 1 млн 84 мең гектар. «Бөртекле һәм кузаклы, азык, техник культуралар чәчәбез. Эш бөтен Башкортстан буйлап бара. Илеш, Архангель, Кырмаскалы, Дүртөйле, Авыргазы, Әлшәй районнарында эшләр тәмамланып килә: 73-84 процентка  үтәлгән инде ", -- дип яза төбәк җитәкчесе.

Радий Хәбиров билгеләп үткәнчә, быел һава торышы кырларга ике атнага алданрак  чыгу мөмкинлеге бирде. «Аграрийларыбызга моңа әзер булулары өчен рәхмәт -- вакытында орлык һәм ягулык-майлау материаллары запасы алдык, техника әзерләдек», -- ди ул.