Европа һәм АКШ үзләре куйган тырмага басты

Русия Президенты Владимир Путин XXV Петербург халыкара икътисади форумының пленар утырышында катнашты. Чарага шулай ук Казахстан Президенты Касым-Жомарт Токаев килгән иде. Кытай халык республикасы рәисе Си Цзиньпин һәм Мисыр Президенты Әбделфаттах Сиси катнашучыларга видеомөрәҗәгать белән чыктылар.

Быел форум “яңа дөнья – яңа мөмкинлекләр” девизы астында узды. Форумда иң төп чыгышны Владимир Путин ясады. Ул санкция белдерүчеләрнең үзләре куйган тырмага басуларын әйтте:

– Европа сәясәтчеләре үз икътисадына җитди зыян китерде – моны үз куллары белән эшләделәр. Без Европадагы социаль һәм икътисади проблемалар кискенләшүен күрәбез, Кушма Штатларда да товарлар, азык-төлек, электр энергиясе һәм автомобиль ягулыгы бәяләре арта, европалыларның тормыш сыйфаты кими һәм предприятиеләрнең көндәшлеккә сәләтлелеге кими бара,– диде Владимир Путин һәм безнең илнең гаять зур потенциалга ия булуын ассызыклады

Фото: kremlin.ru