Льготалы ипотека шартлары үзгәрә

Русиядә, шул исәптән, Башкортстанда да ташламалы дәүләт ипотекасы төрләренең шартлары үзгәрә. Бу хактагы карарга бүген Русия Хөкүмәте рәисе Михаил Мишустин кул куйды. 

Яңа шартлар түбәндәгеләрдән гыйбарәт:

1. 2020 елда елда Русия Президенты Указы белән төзелеш өлкәсендәге кризиска каршы чара буларак кабул ителгән “Путин ипотекасы”ның ставкасы 5,5-6,5 проценттан 12 процентка кадәр күтәрелә. Бу ставка 1 апрельдән гамәлгә керә. Бу датага кадәр кабул ителгән ипотека килешүләренең шартлары үзгәрми, элеккечә кала. Аның каравы элек кеше ипотека кредиты итеп 3 миллион сумга кадәр акча ала алса, хәзер бу сумма 6 миллион сум тәшкил итә. Мәскәү өчен ул, гомумән, 12 миллион сум. Яңа ставка 2022 елның 1 июленә кадәр гамәлдә булачак.
2. Балалары 2018 елның 1 гыйнварыннан соң туган гаиләләр өчен “Гаилә ипотекасы” шартлары үзгәрми, 6 процент күләмендә кала.
3. “Авыл ипотекасы” шартлары да үзгәрешсез кала. Ул элекке кебек үк, 3 процентлы ставка буенча биреләчәк.

2022 елның 1 марты на Башкортстанда гражданнарга барлыгы 338 миллиард сумлык ипотека кредиты бирелгән. Шушы сумманың 20 проценттан арттыгын ташламалы ипотека (“Путин ипотекасы”,  “Гаилә ипотекасы”, “Авыл ипотекасы”) акчалары тәшкил итә.

Фото: sibadvokat.ru