-4 °С
Болытлы
Барлык яңалыклар
Тузганак
26 февраль 2020, 11:50
Гөлфизә КӘЛИМУЛЛИНА. Сез кирәк!
8 Март бәйрәменә балалар бакчалары, башлангыч сыйныфлар өчен сценарий.
Катнашалар: балалар, тәрбияче я укытучы, әти, картәти, кунаклар.
Зал матур итеп бизәлгән.
Талгын музыка астында балалар чыгып тезеләләр.
1нче бала.
Бакчабызда олы бәйрәм –
Хатын-кызлар бәйрәме.
Безгә кунаклар килгәннәр,
Тотып чәчәк бәйләме.
2нче бала.
Бәйрәм көнне бирербез, дип,
Әзерләдек без бүләк.
Һәркайсыбыз, бик тырышып,
Төшерде матур сурәт.
Балалар.
Гомер юлларын үткәндә
Әни әтигә кирәк.
Авырлыкларны җиңгәндә
Әти – әнигә терәк.
Авырмагыз, аерылмагыз,
Әле безгә сез кирәк.
Картайган көннәрегездә
Булырбыз без дә терәк.
Балалар бүләкләрен тапшыралар.
Әти.
Бәйрәм белән, хатын-кызлар!
Юлларыгыз уң булсын.
Тормышыгыз гөрләп торсын,
Табыныгыз мул булсын.
Кояш та күктән елмая,
Сибеп Җиргә нурларын.
Әниләр, сезгә әйтәбез
Рәхмәтләрнең зурларын.
Картәти.
Татыдык без бу дөньяның
Әчесен һәм төчесен.
Менә күрергә язды бит
Оныкларның өчесен.
Барлык картәниләрне дә
Бәйрәм белән тәбриклим.
Озын гомер, сәламәтлек,
Бәхетле картлык телим.
Ир-атлар бакчадагы хатын-кызларга чәчәкләр бүләк итәләр.
Тәрбияче.
Җылы да ул, назлы да ул
Әниләрнең кочагы.
Алар булганда сүрелми
Гаиләнең учагы.
Бергәләшеп, әниләргә багышланган җыр җырлыйлар.
3нче бала.
Әни назлый “багалмам” дип,
Әтием сыйпый баштан.
Ә нәнәйнең, белүемчә,
Сөюе чиктән ашкан.
Ике күзе – күзлекнеке,
Икесе – үзенеке.
Дүрт күз белән көткән бабай,
Картәти – үземнеке.
Сезгә сәламәтлек телим,
Исән була күрегез.
Онык-оныкачлар белән
Тулып торсын түрегез.
4нче бала.
Әти гел елмаеп тора
Әти өйдә чагында.
Бүләк итә чәчәкләрнең
Кызылын да, агын да.
Кызылында сөю хисе,
Агы – пакълек билгесе.
Уңган, тыйнак әниебез
Гаиләбез өлгесе.
Мин дә әнине хөрмәтлим,
Әтидән үрнәк алам.
Теләкләрнең иң изгесен
Әнигә теләп калам.
5нче бала.
Әниемнән ишетәм мин
Бары тик матур сүзләр.
Һәрчак озатып калалар
Елмаеп торган күзләр.
Инде зур малай булсам да
Аның өчен мин нәни.
“Бәләкәчем”, “йомшагым” дип,
Ярата мине әни.
Уеннар, ярышлар оештырыла.
Әти.
Ходайның биргән көннәре
Булсын гел дә мөбәрәк.
Әниләр, сез булганга бит
Тормышыбыз түгәрәк.
Әниләрнең беркайчан да
Күңеле кимсенмәсен.
Түп-түгәрәк дөньябызның
Читләре кителмәсен.
Тәрбияче.
Кулыбызда чәчәкләрнең
Кызылы, алы, агы.
Көтеп алган бәйрәмнең дә
Якынлаша азагы.
Бәйрәм саен безгә килеп,
Күңел ачып китегез.
Хәзер инде барыгыз да
Чәйгә рәхим итегез!
Бәйрәм күңелле чәй табыны белән тәмамлана.
Читайте нас:
© 1994-2024 елдан татар телендә чыгып килүче әдәби-нәфис, иҗтимагый-сәяси матбага
Баш мөхәррир: Фаил Камил улы Фәтхетдинов
Телефон
8(347)272-67-48
Электрон почта
Адресы
450079, Республика Башкортостан, г. Уфа, ул. 50 летия Октября, 13, каб. 612
Реклама хезмәте
8(347) 272-62-27
Редакция
8(347) 272-67-48
Кабул итү бүлмәсе
8(347)272-13-61
Хезмәттәшлек
8(347) 272-67-48
Кадрлар бүлеге
8(347) 272-13-61