Сөмбел ШӘРӘФЕТДИНОВА. Болытлар

Ак болытларның агышын

Карап ятам яланда.

Күзләремә, йөзләремә

Кояш нурлары ява.

Әнә бер болыт гел дә син!

Ә янында бар мин дә...

Җитәкләшеп, елмаешып,

Очтык без икәү бергә!

Очыныплар очкан чакта,

Җилбәзәк җилләр исте...

... Күктән эзлим, җирдән эзлим

Хыялдагы шул хисне.

***

Автор турында 

Мин, Сөмбел Марат кызы Шәрәфетдинова, Кыйгы районының Еланлы авылында туып-үстем. Хәзерге вакытта Башкорт дәүләт университетының филология факультетында, татар-урыс бүлегендә белем алам. Җырларга яратам. Хыялым – журналист булып эшләү.