+6 °С
Болытлы
Барлык яңалыклар
Шигърият
30 сентябрь 2020, 00:59
Италиядән шигырьләр
Хаталандык, үкенечләрҖанны телә гомергә.
ӘНИ КИРӘК!
Хастаханә. Палаталар.
Мин залдан барам үтеп.
Ишетәмен бер кешенең
Ятканын, ярдәм көтеп.
"Әни, әни", диеп кемдер
Чакыра бит анасын.
Эх, мин әйтәм, бу әнисе
Ник ишетми баласын?!
Бәлки минем ярдәм тияр,
Карыйм әле, дим кереп.
Аннан юньсез анасына
Әйтермен димен күреп.
Ишек ачтым... Кроватьта
Ята йөзъяшәр бабай.
Янында аңа иптәшкә
Утыра иде малай.
"Кем чакыра әнисен?" – дип
Сорыйм карап малайга.
Ә ул әйтә: "Әни кирәк
Менә безнең бабайга.
Мин, – ди, – оныгының улы,
Утырам иптәш булып.
Бабаема бер ай элек
Үтте йөз дә бер тулып.
Әби дә бар, ул яшерәк
Туксан дүрт кенә бары.
Әби, бабакаебызның
Тәүге, бердәнбер яры.
Бабаем чирләгән чакта
Чакыра гел анасын...”
...Бәлки, ана тегеннән дә
Курчалыйдыр баласын...
АК КАЕНГА ЯЗГАН ИДЕК
Ак каенга язган идек
Исемебезне уеп.
Ике исем арасына
Кушу билгесе куеп.
Әллә каен каргадымы?
Без ясаганга яра?
Белмим, тик нәкъ шуңардан соң
Киселде безнең ара.
Бер дә юкка үпкәләштек,
Аерым китте юллар.
Газаплы сагыш эчендә
Үтелде күпме еллар.
Каендагы язу гына
Калды истәлек булып.
Чарасыздан йөрәк әрни
Хатирәләргә тулып.
Хаталандык, үкенечләр
Җанны телә гомергә.
Каенда кушып язылган
Исемнәр генә бергә...
Белешмә:
Рәмзия Сәлим кызы Шәрәфетдинова Чакмагыш районының Яңа Калмаш авылында дөньяга килгән. Техникумда белем алган. Тамьян авылы егете Радик белән гаилә корып, өч кыз тәрбияләп үстергәннәр. Бик күп еллар “Байрак” хуҗалыгында хисапчы, баш экономист, профсоюз мөдире вазыйфасын башкара. Әлеге вакытта Италиядә яши һәм иҗат итә.
2015нче елда “Күңелем чаткылары” исемле беренче үзнәшер китабын чыгарган иде. Шуннан соң аның “Чит илләрдә, ят җирләрдә”, “Күңелем хисләре”, “Канатлы хисләр”, “Тип әле син, йөрәккәем” дигән җыентыклары чыкты. Иҗатына ихласлык, җирсү, җиңелчә юмор, үзенә көлеп карау кебек үзенчәлекләр хас. Туганнарына, дусларына, якыннарына төрле бәйрәмнәр, юбилейлар уңаеннан котлаулар да иҗат итә. Күп кенә бәетләр авторы.
Чит илдә, башка мохиттә яшәсә дә, туган тел, якташлар дип җан ата, кулыннан каләмен төшерми.
Рәмзия ШӘРӘФЕТДИНОВА фотосы.
Читайте нас:
© 1994-2024 елдан татар телендә чыгып килүче әдәби-нәфис, иҗтимагый-сәяси матбага
Баш мөхәррир: Фаил Камил улы Фәтхетдинов
Телефон
8(347)272-67-48
Электрон почта
Адресы
450079, Республика Башкортостан, г. Уфа, ул. 50 летия Октября, 13, каб. 612
Реклама хезмәте
8(347) 272-62-27
Редакция
8(347) 272-67-48
Кабул итү бүлмәсе
8(347)272-13-61
Хезмәттәшлек
8(347) 272-67-48
Кадрлар бүлеге
8(347) 272-13-61