-6 °С
Болытлы
Барлык яңалыклар
Шигърият
1 сентябрь 2020, 11:50
Гөлфизә КӘЛИМУЛЛИНА. Көзге шигырьләр
Көзгә багышлап шигырь язмаган шагыйрь юктыр да, мөгаен. Даими авторыбыз Гөлфизә КӘЛИМУЛЛИНА иҗатында исә алар аерым бер цикл тәшкил итә. Көзгә хас алтын-сары төсләр дә, моң-сагыш та, хәтта берникадәр елаклык та бар аларда. Хәер, үзегез укып карагыз...
КӨЗГЕ САГЫШ
Көзләр көзләр инде, язлар түгел,
Тирә-юньдә сагыш сизелә.
Көзләр килгән саен, чыңлый-чыңлый,
Йөрәгемдә бер кыл өзелә.
Сары сарган агачларга карап,
Күзләремнән яшьләр түгелә.
Җәйләр узып, көзләр килгән саен,
Йөрәктәге ялкын сүрелә.
Көз бизәге, моңсу бер җыр булып,
Кереп кала күңел түренә.
Сары сагышлардан арыналмый,
Менеп барам гомер үренә.
КӨЗ
Хиссезләр дә хискә биреләләр,
Илһам килә һәрчак көзләрен.
Алтын-сары яфракларын коеп,
Көз калдыра Җирдә эзләрен.
Муллык төяп килә, кешеләрне
Бәхетле дә, бай да итәргә.
Чуак көннәр белән куандыра,
Ашыкмасын әле китәргә.
Кемдер көтә ак буранлы кышны,
Кайберәүләр җәйне сагына.
Күңелендә шигырь тудырганнар
Сагыш баскан көзгә табына.
Көзнең дә бит була төрле чагы,
Моңсу мәле аның елата.
Талгын җилләр, гафу үтенгәндәй,
Күз яшьләрен сөртеп, юата.
Төсләр балкышыннан әсәрләнеп,
Күңелдәге томан тарала.
Шушы матурлыкны күргәннәрнең
Йөрәгендә сөю ярала.
Хиссезләр дә хискә биреләләр,
Илһам килә бары көзләрен.
Алтын-сары яфракларын сибеп,
Ул калдыра безгә эзләрен.
ХИСЛӘР
Кайчан гына әле җәйне көтә идек,
Инде җилләрдән дә килә көз исләре.
Һәр мизгелнең төсе, исе булган кебек,
Була бит ул назга тулы үз хисләре.
Нинди мизгел – шундый хисләр күңелләрдә,
Үз хисләре белән алар бүлешәләр.
Талгын җилләр, иркәләп һәм назлап кына,
«Хәерле көн», – диеп, гүя, күрешәләр.
Әле кайчан гына җәйне көтә идек,
Жилләрдән дә килә инде көз исләре.
Күңелемдә – узган елдан торып калган,
Сарыф ителмәгән моңсу көз хисләре.
* * *
Җәй гомере бары мизгел генә,
Бар табигать инде көзгә тарта.
Ялан-кырлар бушый барган саен,
Күңелләрдә моң һәм сагыш арта.
Фото: https: //vk.com/im?sel=215345055&z=photo215345055_457242784%2Falbum215345055_00%2Frev
Читайте нас:
© 1994-2024 елдан татар телендә чыгып килүче әдәби-нәфис, иҗтимагый-сәяси матбага
Баш мөхәррир: Фаил Камил улы Фәтхетдинов
Телефон
8(347)272-67-48
Электрон почта
Адресы
450079, Республика Башкортостан, г. Уфа, ул. 50 летия Октября, 13, каб. 612
Реклама хезмәте
8(347) 272-62-27
Редакция
8(347) 272-67-48
Кабул итү бүлмәсе
8(347)272-13-61
Хезмәттәшлек
8(347) 272-67-48
Кадрлар бүлеге
8(347) 272-13-61