КОРОНАВИРУСИЯ

Соңгы чорда коронавирус дөньядагы төп темага әйләнде. Сүз Бүздәк районында яшәүче Нур Ахуновка.

КОРОНАВИРУСИЯ

Яңа падишаһ тәхеттә,

Исеме – таҗлы вирус,

Шул падишаһка табына

Татар, башкорт һәм урыс.

Әйтәләр, яңа себерке

Себерә, дип, яңача,

Эшкә кереште падишаһ,

Көн дә яңалык ача.

Кертеп бикләде халыкны

Дүрт дивар арасына,

Җан иясе юк урамда,

Карантин барысына.

Туган туганны танымый,

Йөзне каплаган битлек,

Кул биреп юк күрешүләр,

Шул көнгә килеп җиттек.

Могҗиза тудыра кеше,

Сакланам дип вирустан,

Сәмәй белән юа кулын,

Башына кия ыштан.

Бәдрәф кәгазьләрен алдык,

Макарон да җитәрлек,

“Антивирус”ны капкалап,

Рәт бар әле яшәрлек.

Безнең халык көчле, чыдам,

Якты безнең киләчәк.

Фашистларны җиңгән халкым

Чуманы да җиңәчәк.

Белешмә: Нур АХУНОВ Благовар районы Яңа Сынташ авылында ун балалы гаиләдә сигезенче була. Хезмәт юлын физика укытучысы булып башлый. Читтән торып Башкорт дәүләт педагогия институтының математика белгечлегенә укырга керә. Өч ел укытканнан соң хәрби хезмәткә алына. Армиядән соң КПССның Благовар район комитетында инструктор, аннан соң Бүздәк районының эчке эшләр бүлегендә эшли. Хаклы ялга чыгар алдыннан район хакимиятендә һәм статистика бүлегендә җаваплы вазыйфалар башкара.

Беренче шигырьләрен хакимияттә кадрлар бүлеге башлыгы булып эшләгәндә яза башлый. “Күңелем чаткылары” исемле үзнәшер китап авторы.

Автор фотосы.