“ТУЛПАР”ГА МӘДХИЯ БӘЙГЕСЕ: ЛИЛИЯ СӘГЫЙДУЛЛИНА

* * *

Мин кайчандыр тулпар булгандырмын:

“Тулпар” күрсәм, йөрәк ашкына.

Авызлыклап куйган тоткын-җаным

Канатланып ала чак кына.

Мин кайчандыр тулпар булгандырмын –

Башка гомерләрне кичкәндә.

Шуңа, ахры, мин “Тулпар”га тугры

Көнен-төнен... Иртән... Кичтән дә...

Мин кайчандыр тулпар булгандырмын:

Һәркөн әзерләнәм очарга!

Язмыш тәртәләрен җимергәндә,

Таянамын һаман “Тулпар”га.

Мин кайчандыр тулпар булгандырмын.

Тулпарланам кайчак бүген дә...

Вакыт чиген кичмәк булсаң, халкым, –

Канатлан син “Тулпар” күгендә!

16.10.19

P.S. Элек язылган шигырьгә нигезләнеп, шаярып кына башлаган идем – икенчерәк әйбер килеп чыкты. Шаяруы да, чыны да бергә.