ПАРОДИЯГӘ ПАРОДИЯ

Ирек ГАЛИН

Ирек Хәниф улы Галин Борай районының Сармаш авылында дөньяга килә. Туган авылында башлангыч белем алгач, күрше Зур Бәдрәш урта мәктәбен тәмамлый. Һөнәрчелек училищесында водитель таныклыгы алып өч ай эшләгәч, армиягә чакырыла. Кытай чигендә һава һөҗүменә каршы саклану көчләрендә хезмәт итә. Армиядән соң Борайда, Бөредә, Төркмәнстанда эшли. 1983нче елдан башлап Уфада яши.

Ирек Галин балачактан җыр-моңга гашыйк, кечкенә яшьтән үк гармунда уйнарга өйрәнә. Борайда яшәгәндә район мәдәният йортының автоклуб машинасын йөртә. Авыл хезмәтчәннәре тарафыннан оештырылган мәдәни чараларда да катнаша. Бүгенге көндә дә гармуныннан аерылмый.

Әтисе Хәниф бакыйлыкка күчкәннән соң кулына каләм алып, шигырьләр, җыр текстлары яза башлый. Алар республика матбугатында даими дөнья күреп килә. Иҗатына гадилек, дуамаллык, бунтарьлык хас.

ПАРОДИЯГӘ ПАРОДИЯ

* * *

Айнур Маратович,

Син бер мәлне

Ару гына егет булырсың.

Күн курткадан гына такси көтеп,

Уфа урамында торырсың.

Марат КӘБИРОВ.

Булат Мөнирович,

Син бер вакыт,

Пәһлевандай егет булырсың.

Мескенләнеп такси көтмәенчә,

Машинаңда гына узырсың.

Машинаң да синең

Гади булмас,

“Мерседес”мы шунда, “Джип”мы.

Кул күтәреп торса утыртырсың

Айнур Кәбир атлы егетне.

Мөнир ВАФИН.

Мирас Ирекович,

Син бер чакны

Полиция шефы булырсың,

Кара күзлек киеп,

Вертолеттан гына,

Урамнарны карап йөрерсең.

Чатта торган гаишникларыңа

Өстән генә әмер бирерсең.

Һәм штрафка җыйган акчаларны

Кейс белән җыеп йөрерсең.

Айнур Маратович өшемәсен –

Берәр толып алып бирерсең.

“Джип”тагы Булат нык куса да,

Тимәгән бул, әйдә, йөресен.

Мирас Ирекович, насыйп булса,

Шагыйрь балаларын хур итмә.

Күмертаудан “К-12” алып бир,

Икесенә берне – шул җитә.