ШАГЫЙРЬ КАМИЛ ФАЗЛЫЙГА – 70 ЯШЬ

Камил Нәҗметдин улы ФАЗЛЕТДИНОВ 1949нчы елның 8нче февралендә Башкортстанның Бәләбәй районы Тузлыкуш авылында хезмәткәр гаиләсендә туа. Биредә урта белем алганнан соң, Байморза сигезьеллык мәктәбендә балалар укыта, Бәләбәй шәһәрендә милициядә эшли, Совет армиясе сафларында хезмәт итә. 1970-1975нче елларда Башкорт дәүләт университетының филология факультетындагы татар-урыс бүлеген тәмамлый.Камил Фазлый – бар гомерен мәгарифкә багышлаган шәхес. Озак еллар туган авылында мәктәп директоры булып эшли, “Мәгариф алдынгысы” (1994), “Башкортстанның атказанган укытучысы” (2005) исемнәре белән бүләкләнә. 2006нчы елда "Русиянең иң яхшы укытучылары" конкурсында җиңеп, Русия Федерациясе Президенты премиясенә лаек була. 2017 елда аңа “Бәләбәй районының шәрәфле гражданины” дигән мактаулы исем бирелде.“Тырыш пионер” дигән беренче шигыре 1963нче елда “Башкортстан пионеры” гәзитендә дөнья күрә. Бүгенге көндә ул — Башкортстанның Ф. Кәрим исемендәге әдәби премия лауреаты (2000), Башкортстан һәм Русия Журналистлар берлеге (2005) һәм Язучылар берлеге (1997) әгъзасы. Башкортстан китап нәшриятында аның башкорт һәм татар телләрендә дистәгә якын җыентыгы дөнья күрде.“Тулпар” журналы каләмдәшебезне күркәм юбилее белән ихлас котлый һәм яңадан-яңа иҗади уңышлар тели!