Барлык яңалыклар
Шәхес
16 февраль , 16:46

Равил Шаммас – халык шагыйре!

Әле дә мин таңнан торам,Гүя мин дә мич ягам.Чи утыннар чарт-чорт килә.Мин таңда шигырь язам.

Равил Шаммаска Башкортстанның халык шагыйре исеме бирелде. Ул узган елның 9 ноябрендә 90 яшен тутырган иде.

ӘНИЕМ ГАДӘТЕ

Таңнан торып әниемнең
Салкын мичен якканы,
Чи утынның, булар бөркеп,
Чарт-чорт килеп янганы,
Таңнан торып,
Без, сабыйлар,
Тезелеп утырганнар
Күз алдында,
Күз алдымда
Сабый чактагы таңнар.

Ашыга-ашыга киенер дә
Әнием китәр иде,
Салкын магазин төбендә
Ул икмәк көтәр иде.

Чарт-чорт килгән утыннарга
Ялкын йөгерер иде.
Тәрәзләрдәге боз-үлән
Эреп, терелер иде.

Менә берчак ишегебездә
Әнкәй күренер иде,
Йөзебезгә, күзебезгә
Шатлык сибелер иде.

Уч төбедәй кара икмәк
Бишкә бүленер иде.
Безнең куллар тыйнак кына
Шуңа үрелер иде.

Чи утыннар күптән янды, –
Бик еракта калганнар.
Ә йөрәктә,
Күз алдымда
Сабый чактагы таңнар.

Әле дә мин таңнан торам,
Гүя мин дә мич ягам.
Чи утыннар чарт-чорт килә.
Мин таңда шигырь язам.
Мичем кыза. Тәрәз эри –
Боз-үләннәр терелә.

Юк, мич түгел, үзем янам,
Таңым – шигырь сәгате.
Сабый чактан калган, ахры,
Әниемнең гадәте.

Белешмә:
Равил Шаммас (Равил Сәхиулла улы Шаммасов) Стәрлебаш районы Хәлекәй авылында колхозчы гаиләсендә туган. Стәрлетамак педагогия институтын тәмамлаганнан соң, хезмәт юлын 1952нче елда Зилаер районының Сабыр авылында укытучы булып башлый, Стәрлебаш районының Яшерган авылында укытучы һәм мәктәп директоры була. Стәрлебаш районы гәзите редакциясендә, “Кызыл таң”да, “Һәнәк” журналында, Башкортстан китап нәшриятында, Республика тынычлык комитетында, Язучылар берлеге аппаратында хезмәт итә.
“Таң елмаюы” исемле тәүге китабы 1967нче елда басыла. Аннан соң бер-бер артлы “Утлар”, “Дөнья йөге”, “Чишмәле тау”, “Кояшлы тәрәзәләр”, “Кар сулары китә”, “Тамчылар җырлап тама”, “Җан яшәртер ямьнәрем”, “Гомер гөлләмәсе”, “Яраларны сөю дәвалар”, “Акыл таягы” һәм башка шигъри китаплары дөнья күрә.
“Каен суы” исемле җыентыгы Мәскәүдә урыс телендә, “Гомер учагымның кузлары” Уфада татар телендә нәшер ителгән. Узган елда аның ике томлыгы да нәшер ителгән иде.

Фото: Равил Шаммас.