Моңнуллинсыз калдык

Бүген якташыбыз, Татарстанның халык шагыйре Роберт Миңнуллинны соңгы юлга озаттылар. Озату мәрәсимендә Башкортстаннан да саллы делегация катнашты. Алар арасында Башкортстанның мәдәният министры урынбасары Рәнис Алтынбаев, “Кызыл таң” нәшрияты йорты җитәкчесе Фаил Фәтхтдинов, Башкортстан Язучылар берлеге рәисе Зәки Әлибаев, Мифтахетдин Акмулла исемендәге Башкорт педагогия университетының татар теле һәм әдәбияты кафедрасы мөдире Илшат Насипов, Илеш районы хакимияте башлыгы Илдар Мостафин һәм башкалар бар иде.
Роберт Миңнуллин көнүзәк, актуаль поэзиядә алдынгылыкны бирмәде. Удмурт галиме үзен яндыргач та, коронавирус чыккач та иң беренче шигъри сүзне ул әйтте. Заман технологияләрен авызлыклап, интернет аша укучылары белән һәрдаим аралашып торды.

Роберт абый Татарстан һәм Башкортстан арасында үзенә күрә бер күпер кебек иде. Бүген ул күперсез торып калдык.