Elvin Grey кайчан өйләнер?

Бүгенге көндә татар һәм башкорт эстрадасында Elvin GREY кебек популяр җырчы юк. Сәнгать юлын Радик ЮЛЪЯКШИН буларак башлаган якташыбыз меңнәрчә кеше сыярлык стадионнар җыя, дөньяның иң танылган җырчылары белән бергә чыгыш ясый, кыйммәтле клиплар төшерә. Кызлар да аның артыннан көтүләре белән ияреп йөри. Тик... Шәхси тормышы гына мактанырлык түгел аның. Инде 31 яшен тутырса да, һаман гаилә кора алмый әле ул. Һәм, кимендә, тагын ике ел кора алмаячак... Моның сәбәпләре нидә икән? Җавап – сайтта!

Elvin GREY сәхнә тәхәллүсен йөртүче популяр җырчы Радик ЮЛЪЯКШИНга 17 майда 31 яшь тулды. Бер уйласаң, күптән гаилә корып җибәреп, сөйгәнең белән балалар үстерергә вакыт. Ләкин артист тормышының, Бәләбәйчә әйтсәк, үз “эскиләре” бар шул. Ул үзенә-үзе хуҗа түгел, контракт шартларына бәйле. Бу хакта соңгы интервьюларының берсендә Elvin GREY үзе “тиште”.

Җырчы әйтүенчә, Elvin GREY проектының продюсерлык фирмасы белән контракт шартлары буенча, ул үзенә 33 яшь тулганчы өйләнә алмый. Кызлар белән күпме тели, шулкадәр мәхәббәт куерта алса да, аңа 33кә кадәр мөнәсәбәтләрен законлы никахта рәсмиләштерү тыела, чөнки бу аның иҗади эшчәнлегенә, ә димәк, популярлыгына да зыян итәргә мөмкин. Популярлык исә концертларга билетлар сатылуның төп чыганагы.

Хәтерегезгә төшерәбез, Elvin GREY 2018-2019 елларда 8000нән артык тамашачы сыйдырышлы “Уфа-Арена” стадионын шыгрым тутырып концерт биргән дөньядагы дүрт коллективның берсе булды. Аңардан башка моңа Германиянең легендар “Scorpions” рок-төркеме, якташыбыз Юрий Шевчукның данлыклы “ДДТ”сы һәм 1990 елларда илне шаулаткан “Руки вверх” поп-төркеме генә иреште. Elvin GREY концертларына йөрүчеләрнең күпчелеге – кызлар. Алар җырчының иҗатына гына түгел, үзенә дә гашыйк. Шуңа да егетнең өйләнүе алар өчен зур югалту булыр иде. Ә болай әле өмет бар... Ярар, һәр һөнәрнең дә үз авырлыклары була. Сабыр итик... Вакыт барысын да үз урынына куяр...

Фото: 100biografiy.ru