Шәмсулла бәете

Башкортстан татарлары тарафыннан Бөек Ватан сугышы елларында иҗат ителгән бәетләрне сайтыбызда бирүне дәвам итәбез. “Шәмсулла бәете”н 1971 елда Башкортстанның Шаран районы Күгәрчен Бүләк авылында Хәкимә Сәгъдиевадан БДУ студентлары язып алган. Хәкимә әби аны 1918 елда туып, 1939 елда армиягә киткән һәм капитан дәрәҗәсендә 1943 елда фронтта һәлак булган улы Шәмсулла Зиязовка багышлап иҗат иткән булган. Бәет Уфа Фән һәм технологияләр университетының татар филологиясе һәм мәдәнияте кафедрасы фольклор фондында саклана.

Шәмсулла бәете

И, бәбкәем, кая киттең,

Син бу илдин.

Көн-төн чыкмыйсың бит

Син күңелдин.

Без торабыз бу дөньяда

Мәхрүм булып.

Син бәбкәем кайтмаганга

Хәйран калып.

Сулар алып киткән кебек

Киттең агып.

Шул китүдән кайта алмадың

Дөнья салып.

Аккош оча җөнен койган,

Аның җөнен кем җыйган?

Чит илләрдә вафат булдың

Җиназа укып кем куйган.

Дошманнарның каршысына

Күкрәк киереп син бардыңмы?

Дошманнарның килгәнен күргәч,

Өсләренә мылтык атып син калдыңмы?

И, бәбкәем, бу дөньяда исмең калды.

Чит илләрдә аерым булып җисемең калды.

Фото: https://sun9-27.userapi.com

Шәмсулла бәете

Автор:Илдус Фазлетдинов

Читайте нас: