“Башкортстан чишмәләре” проектында катнаш!

Башкортстан Яшьләр Хөкүмәтенең Табигать һәм экология министры Рөстәм Сәйфетдинов сүзләренә караганда, проект республикада беренче тапкыр башкарыла. Аның кыйммәте, барыннан да элек, инде билгеле су чыганакларын саклауда гына түгел, ә яңаларын эзләү, аларны рациональ файдалануны тәэмин итүдә дә.

Шунысын да билгеләп үтәргә кирәк, проектның өстенлекле юнәлешләренең берсе – чишмәләрдән файдалану культурасын күтәрү, халыкны чиста су белән тәэмин итү, шул рәвешле кешеләрнең гомер озынлыгын арттыру. “Башкортстан чишмәләре” “Экология” гомумдәүләт проектының “Уникаль су объектларын саклау” федераль проекты кысаларында башкарыла.

Эшләрне бәяләү түбәндәге критерийлар буенча узачак: суның биологик составын анализлау, объектның тарихи әһәмияте һәм мәдәни кыйммәте, әлеге чишмәнең торышы һәм туристларны җәлеп итүчәнлеге.

Проектта катнашу өчен түбәндәге документларны тапшырырга кирәк: чишмәне төзекләндерүгә гариза, фотографияләр, суга анализ (15 элементтан да ким булмаган химик анализ, органолептик, бактериологик тикшерү), муниципаль берәмлек хакимиятеннән җир милекчесе турында белешмә, Генпланнан өземтә, объектның тарихи һәм мәдәни кыйммәтен раслаучы архив документлары.

Җиңүчеләрне “Яшел Башкортстан” Республика җәмәгать оешмасы экспертлары, Башкортстанның Табигатьтән файдалану һәм экология министрлыгы хезмәткәрләре, Яшьләр хөкүмәте һәм массакүләм мәгълүмат чаралары вәкилләре, әйләнә-тирә мохитне саклау өлкәсендә җәмәгать инспекторлары, дизайнерлар һәм республиканың терәк югары йорты студентлары билгеләячәк.

– Без чишмәләрне саклау, төзекләндерү, яңадан торгызу һәм яңа су чыганакларын эзләү юнәлешен очраклы гына сайламадык. Республикабыз табигый чыганакларга бай, ә чишмә суына ихтыяҗ зур, чөнки аның химик һәм биологик составы бик бай. “Башкортстан чишмәләре” республика экологик проекты кысаларында халык туган як чишмәләрен төзекләндереп, әйләнә-тирә табигатьне саклауга өлеш кертә алыр дип ышанам. Экологиягә битараф булмаган барлык кешеләр безне хуплар һәм проектта актив катнашырлар дип өметләнәм, – дип билгеләп үтте Рөстәм Сәйфетдинов.

Конкурс нәтиҗәләре “Яшел Башкортстан” иҗтимагый оешмасы сайтында һәм ВКонтакте төркемендә басылып чыгачак.

Барлык оештыру мәсьәләләре буенча проект координаторы Рөстәм Сәйфетдиновка (89174783596) мөрәҗәгать итәргә кирәк. Конкурс документациясе info@greenbashkiria.ru электрон адресына җибәрелә. Шулай ук гаризаны почта аша 450008, Башкортстан Республикасы, Уфа шәһәре, Пушкин урамы, 95 йорт, 311 каб. адресы буенча да тапшырырга мөмкин.

Чыганак: https://srk.nationalpriority.ru/press_releases/72301