Сөт күләмен су кушмый арттырып була

Башкортстанда “хезмәт җитештерүчәнлеге” милли проекты кысаларында сакчыл технологияләр исәбенә сөт җитештерү күләмен арттырачаклар. Федераль үзәк экспертлары Кырмыскалы районында “Артемида” сөт фермасында җитештерүнең нәтиҗәлелеген арттырачаклар.

“Хәзер “хезмәт җитештерүчәнлеге” милли проектында Башкортстан Республикасының 100дән артык компаниясе катнаша. Өч ел эчендә алар җитештерүчәнлекне уртача 30 процентка арттырырга исәп тоталар”, – дип белдерде БР икътисади үсеш һәм инвестиция сәясәте министрының беренче урынбасары Айрат Фәхретдинов.
Якындагы ярты елда сыерларны саву процессына карашны яңадан карарга һәм фермада җиһазларның эш нәтиҗәлелеген арттырырга кирәк булачак.

“Без җитештерүчәнлек үсешенең потенциалын бәяләдек инде, ул югары. Әмма, әлбәттә, безгә предприятие хезмәткәрләре белән бергә сыерларны саву процессын “үзгәртеп корырга” кирәк булачак. Без хәзер малларның сыер савучыларга чират торуын күрәбез, ә җиһазлар еш кына сафтан чыга, бу предприятие эшен туктата. Безнең бурыч – сыер саву вакытын киметү, әлеге процесста эшләүче хезмәткәрләрнең савымын арттыру, техника эшенең нәтиҗәлелеген уртача 20 процентка арттыру”, – дип аңлатты ФЦК проектлары җитәкчесе Рөстәм Хәйретдинов.

“Артемида” нәсел хуҗалыгы сөт җитештерү һәм нәселле терлек үрчетү белән шөгыльләнә. Бүгенге көндә фермада 2500 баштан артык терлек исәпләнә, шул исәптән 1260 сыер.

Предприятиедә ел саен тугыз мең тоннадан артык сөт җитештерелә.
“Хезмәт җитештерүчәнлеге” милли проекты Русия Федерациясе Президенты Владимир Путинның 2018 елдагы Указы белән расланган һәм илдә ел саен хезмәт җитештерүчәнлеген 2024 елга 5%ка арттыру өчен шартлар тудыруга юнәлдерелгән.

Фото: ru.thehealthypost.com