Октябрьский шәһәрендә “Минем бизнес” үзәгенең яңа офисы ачылды

“Кече һәм урта эшкуарлык һәм шәхси эшкуарлык башлангычларына ярдәм итү” гомумдәүләт проекты кысаларында Октябрьский шәһәрендә “Минем бизнес” үзәгенең яңа офисы ачылды.

Тантаналы чарада Октябрьский шәһәре хакимияте башлыгы Алексей Шмелев, Башкортстанның Эшкуарлык буенча агентлыгының башкарма директоры Рамил Хисмәтуллин, Октябрьский каласының бизнес-шерифы Сергей Литов, эшкуарлар һәм бизнес-җәмәгатьчелек вәкилләре катнашты.

– Бүген без эшкуарлыкка ярдәм итү өчен яңа заманча объект ачабыз. Кече һәм урта бизнес шәһәр һәм республика үсешендә мөһим роль уйный. Биредә эшкуарлар ярдәм алачак, алар өчен консультацияләр һәм укыту форматлары ачык булачак. Бу эшмәкәрлекнең үсешен тәэмин итүче үзәк булыр дип өметләнәбез, – диде ачылу тантанасында Алексей Шмелев.

Хәзер “Минем бизнес” хезмәтләреннән файдалану өчен (ә аларның саны 150гә якын), шәһәр һәм якын-тирә район эшкуарларына башкалага барырга кирәкми. Яңа эш башлаучы эшмәкәрләр үз эшләрен ничек башларга, нинди оештыру-хокукый формасын сайларга, җаваплылыгы чикләнгән җәмгыятьне яки шәхси эшмәкәрне ничек бушлай теркәргә, ни рәвешле исәп-хисап счеты ачарга – барлык мәсьәләләрне дә “Бердәм тәрәзә” форматында хәл итәргә мөмкин. Гамәлдәге эшкуарларга биредә профильле хезмәтләр күрсәтелә, алар махсус укулар узарга яки дәүләт ярдәме алу өчен гариза бирергә мөмкин.

Исегезгә төшерәбез, эш нәтиҗәлелеге күрсәткечләре буенча “Минем бизнес” республика үзәге Русиядә иң яхшы биш үзәк исемлегенә керә. Узган елда үзәк төбәк эшкуарларына планда каралган 10 мең урынына 15 меңнән артык хезмәт күрсәткән; укыту һәм акселерация программаларына, шулай ук бизнес алып баруның төрле мәсьәләләре буенча консультацияләргә ихтыяҗ аеруча зур булган.

Чыганак: https://srk.nationalpriority.ru/press_releases/64241