Укы гына

Башкортстанның Благовар районы Языково авылында “Мәдәният” илкүләм проектын гамәлгә ашыру кысасында үзәк китапханә базасында яңа буын модельле китапханә ачылды. Бу хакта республика Мәдәният министрлыгының матбугат хезмәте хәбәр итә.

Хәзерге вакытта район китапханәсенә 6 меңнән артык кеше йөри. Китапханә фондларында 60 меңгә якын китап, журнал, гәзит һәм электрон басмалар бар.

“Башинформ” хәбәр иткәнчә, быел Благовар районының үзәк китапханәсе модельле китапханәләр булдыру буенча федераль конкурста җиңүчеләр исемлегенә кергән һәм китап фондларын һәм китапханәне модернизацияләүгә, яңартуга 15 миллион сум акча алган.

Үткәрелгән капиталь төзекләндерү һәм модернизациядән соң бу китапханә бинасы тулысынча үзгәргән.

Хәзер китапханәнең беренче катында, баланың яшен һәм кызыксынуын исәпкә алып, уку зоналары урнашкан. Яшь китап укучылар өчен уңайлы балалар зонасы, интерактив өстәл, коры бассейн һәм өстәл уеннары, шулай ук “Кадрда китап” исеме астында танып-белү чараларын үткәрү өчен зона булдырылган.

Телевизор һәм уен приставкалары булган уен залы өлкәнрәк балалар өчен җиһазландырылган.

Моннан тыш, хәзерге вакытта Благовар районының үзәк китапханәсе интерактив панель, интерактив комлык, виртуаль чынбарлык шлемы, планшетлар һәм электрон китаплар белән җиһазландырылган.

Традицион юнәлешләрдән тыш, китапханәдә хәзер кулланучылар белән эшләүнең инновацион формалары кулланылачак. Сүз, аерым алганда, электрон викториналар, төрле видеоэкскурсияләр, презентацияләр куллану турында бара. Бу бигрәк тә китап укуны алга этәрүдә нәтиҗәле булыр дип көтелә.

Фото: Bashinform.ru