Кыярны ничек ашларга?

Кыяр чәчәк атып, актив өлгергән вакытта аңа ашлама таләп ителә.

Химия кулланырга теләмәгәндә, көл ярдәмгә килә ала. Көл – комплекслы табигый ашлама,  аның составында үсемлекләрне тукландыру өчен кирәкле булган 30лап микроэлемент бар (азоттан кала барысы да диярлек).

Аны теплицада саклык белән кулланырга кирәк. Күпкә китсә, ул туфракны боза, ә кыярлар аның нейтраль реакцияле булуын  ярата.

Теплицадагы кыярны бер сезонда, гадәттә, көл белән 4 тапкыр “сыйларга” мөмкин:

беренче чын яфраклар барлыкка килгәч;

чәчәк ату башлангач;

кыярлар дәррәү өлгергәндә;

Өченче өстәмә ашламадан соң 2 атна үткәч.

Көлне кыяр төпләренә салып, туфрак белән күмештереп куялар. Яисә бер чиләк суга 1-2 стакан көл салып эретеп, һәр төпкә 0,5-2 литр нисбәтеннән сибәләр.