Төштә күргән чынга аша

Төшкә кайчак әллә ниләр кереп йөдәтә, аларны нәрсәгә юрарга да белмисең. Ләкин тарихта башта төшкә кереп, соңыннан тормышка ашкан вакыйгалар да ифрат күп.

*Дмитрий Менделеев – химик элементлар таблицасын, немец химигы Фридрих Кенуле – бензол формуласын, дат физигы Нильс Бор – атом структурасын, авиаконструктор Олег Ан­тонов «Антей» самолетының койрык канаты формасын төшләрендә күргәннәр.

*Булачак декабрист Кондратий Рылеев өч яшьлек чагында үлем чигенә җитеп, дифтери­ядән чирләгән. Улы өчен өзгәләнгән әнисе, озак догалар укыганнан соң, исен җуйгандай, йоклап киткән. Аның төшенә бер-бер артлы берничә бүлмә кергән: берсендә – улы китап укып утыра, икенчесендә – ул инде үсмер егет, өченчесендә – ир корына кергән, иптәшләре белән нәрсәдер турында киңәшләшә. Шулчак ят тавыш анага: «Гаепсез сабыеңа гомер сорама. Тормыш явызлыкла­рын белмәгән фәрештә килеш вафат булсын», – ди. Тик ана: «Юк, мин улымның яшәвен те­лим», – дип кычкырып, соңгы бүлмәгә атлый. Ә анда элмәк асылынып торган була. Ана уя­нып китә һәм янында ниндидер могҗиза белән савыккан улын күрә. 1825 елда Рылеев декабристлар күтәрелешендә катнашканы өчен асып үтерелә.

*Михаил Ломоносов давыл аркасында ке­ше яшәмәгән утрауга барып чыккан әтисенең үлемен төшендә күргән. Утрауны ничек табар­га икәнен анык күрсәтеп, энесенә хат җибәргән. Шуңа карап, балыкчылар Ломоно­совның әтисенең гәүдәсен табып алып кайтканнар.

*Итальян шагыйре Данте үлгәч, аның «Илаһи комедия» поэмасында бер өлешнең юклыгын исләп калып, күрәсең, язып өлгермәгәндер, дип уйлаганнар. Берничә ел үткәч, Данте улы­ның төшенә кергән. Аны үзенең бүлмәсенә җитәкләп керткән дә, стенага төртеп күрсәтеп: «Сез эзләгән әйбер шушында», – дигән. Уянгач, улы әтисенең бүлмәсенә кереп, стенадагы гобеленны күтәрсә, андагы яшерен уемда поэманың җитмәгән шигыре һәм бер­ничә рәсми кәгазь яткан.

Илдус ФАЗЛЕТДИНОВ фотосы.