Бәхетле булу серләре

• Иман һәм аның тармагы булган изге гамәлләр – алар бәхет ачкычлары, аларга ирешергә омтыл. 
• Файдалы гыйлем ал, күбрәк укы – кайгыларың китәр. 
• Тәүбәңне яңартып тор, гомеребезне агулаучы гөнаһлы эшләрдән үзеңне тыярга өйрән. 
• Ешрак Коръән укы, мәгънәсенә төшенергә тырыш, Аллаһны истә тотар өчен зикерләр әйтеп йөр. 
• Кешеләргә изгелек кыл – үзеңне бәхетле тоярсың. 
• Кыю бул, чөнки кыюлык шатлык китерә һәм үз-үзеңә карата ышаныч булдыра. 
• Ачу, көнчеллек, күрә алмаучанлык, саранлык кебек һәм башка шундый яман тойгылардан йөрәгеңне чистарт. 
• Ашау-эчүдәге, сөйләшүдәге, гамәлләрдәге артыклыктан – файдасыз эшләрдән саклан. 
• Бүгенге көн белән яшә: үткәннәр турында күп уйлама – үткәнне кайтарып булмый, киләчәк хакында күп хыялланма – киләчәгең әле җитмәгән. Синең гомерең – ул бүгенге көн, аны матур һәм файдалы итеп үткәр. 
• Берәр файдалы эшкә бөтен булмышың белән бирел – бу синең кайгыларың китүгә сәбәп булыр. 
• Үзеңнән байрак, дәрәҗәлерәк булганнарга түгел, ә ярлырак һәм көчсезрәкләргә кара – булганына шөкер итеп, гыйбрәт алу өчен. 
• Хәл-вакыйгаларның иң начар үсеш алуына да әзер бул, һәм, әгәр дә алар тормышка ашса, сиңа ул кадәр үк авыр булмас. 
• Яман уй-фаразлардан, шик-шөбһәләрдән саклан. 
• Ачуланма. Гафу итәргә, рәхимле булырга өйрән. Бел: безнең гомер бик кыска! 
• Сиңа килгән шатлыкның китүеннән курыкма һәм әле килмәгән бәла өчен алдан кайгырма. Бөтен эшләреңне Аллаһка тапшырып, Аңа тәвәккәллә. 
• Энәдән дөя ясап, авырлыкларыңны зурлама. 
• Минут саен Күкнең ярылып төшүен яисә Җир шарын су басуны хафаланып көтмә. Бел: һәрнәрсәнең үз вакыты. Сиңа язган сынаулар сине барыбер берничек тә урап үтмәс, ә язмаганнары исә сиңа һичкайчан кагылмас. Шуңа да һәрнәрсә өчен алдан борчылып, нервыларыңны бетермә.
• Артык зиннәтле, мул тормыштан саклан, гади бул. Чөнки артык байлык синең вакытыңны урлый, тәннең иркәлеге – җанга газап. 
• Өлешеңә төшкән сынаулар белән өлешеңә төшкән нигъмәтләрне чагыштыр. Әлбәттә, соңгылары һәрчак күбрәк булыр. 
• Кайгы килдеме, уйлан: үзең өчен һәм кешеләр өчен нинди файдалы эш башкара аласың, баштанаяк шул эшкә чум. 
• Сиңа берәрсе яман сүзләр әйтсә дә, бу сүзләр сиңа түгел, аңа зыян. Шуңа да бу хакта күп уйлама. 
• Яхшы уйларда бул, начар уйлардан саклан. Яхшы уйлар – бәхетле буланың бер сәбәбе. 
• Яхшы эшләрең өчен беркемнән дә рәхмәт көтмә – барысын да Аллаһ ризалыгы өчен эшлә, Аңа омтыл, ихлас, эчкерсез бул. 
• Күңелең тарткан эш белән шөгыльлән – синең шөгылең дөньяви бәхетнең бер өлеше булып, үзеңә дә, кешеләргә дә файда китерсен өчен. 
• Һәр эштә дә тәвәккәл бул һәм бүгенге эшеңне иртәгәгә калдырма. 
• Аллаһы Тәгаләнең сиңа биргән нигъмәтләре, яхшылыклары хакында уйлан, алар турында кешеләргә сөйлә, шөкер ит. 
• Аллаһы Тәгалә сиңа иман, акыл, саулык, байлык, ризык, гаилә һәм эш биргән икән, моның өчен Аңа рәхмәтле бул. 
• Кешеләрнең күбрәк яхшы якларына игътибарыңны юнәлт, кимчелекләренә күзеңне йом. Камил кеше юк һәм бу, тәү чиратта, синең үзеңә дә кагыла. 
• Гайбәт сүзләренә ышанма. Кешеләрнең хаталанганын көтеп, кимчелекләрен эзләмә, чөнки бу сиңа да, аларга да бәхет китермәс. 
• Саулыгыңны сакла, чөнки тән сәламәтлеге – җан сәламәтлеге. 
• Аллаһы Тәгаләгә һәрвакыт дога кыл: гафу үтен, ярдәм сора, нәфел намазлар укы, бер кеше дә белмәслек итеп өстәмә уразалар тот. Шул рәвешле җаныңның да, тәнеңнең дә җайлап чистарына баруын сизәрсең. 
• Бәхетле бул! 

Шәех ʼӘйд әл-Карниның «Кайгырма!» («Не грусти!») китабыннан.