Барлык яңалыклар
Иман нуры
11 февраль 2022, 07:53

Дәүләтнекен урлау батырлыкмы?

Кеше малына тимәсә дә, дәүләт малын яисә уртак табышны үзләштерүне гөнаһка санамаучылар очрый. Бу җәһәттән ислам дине нинди карашта?

Дәүләтнекен урлау батырлыкмы?
Дәүләтнекен урлау батырлыкмы?

Әбү Һүмәйд әс-Сәид сөйли: «Аллаһ илчесе (саллаллаһү галәйһи вә сәлләм) хезмәтче итеп Асд кабиләсеннән Ибн әл-Лүтбиййә дигән кешене куйды. Сәдака җыю буенча җаваплы итеп Әмир белән Ибн Гомәр тәгаенләнделәр. Эш тәмамлангач, кайтып барган чакта ул хезмәтче: «Менә бу сезнеке, ә бу минеке, миңа моны бүләк иттеләр», – дип, җыелган малны бүлә башлый.

Бу хакта ишетеп, Аллаһ илчесе (саллаллаһү галәйһи вә сәлләм) мөнбәргә күтәрелде дә, иң тәүдә Аллаһы Тәгаләгә шөкерләр әйткәч, азак: «Минем вәкилемә нәрсә булды? Килде дә: «Менә бу сезнеке, ә бу минеке, миңа моны бүләк иттеләр», – ди. Уйлап карасын: ә ул ата-анасы өендә тик утырса, аңа боларны бүләк итәрләр идеме ни? Кыямәт көнендә кеше хаксызга үзләштергән нәрсәләрен муенында асып йөртәчәк – мөңгерәгән дөя булсынмы ул, үкергән сыер булсынмы, йә бакырган сарык булсынмы», – диде. Шуннан соң ул кулын өскә күтәрде дә: «Йә Аллаһым! Мин аларга җиткерә алдыммы?» – дип сорады (Бохари, Мөслим, Әбү Давыт хәдис җыентыкларыннан).

***

 Мөхәммәт пәйгамбәрнең (саллаллаһү галәйһи вә сәлләм) Киркира исемле бер кешесе бар иде, ул аңа сакчы һәм юл әйберләрен караучы булып хезмәт итте. Ул үлгәч, Аллаһ рәсүле галәйһиссәләм: «Ул утта», – диде. Сәхабәләр бу сүзләрнең сәбәбен эзли башлый һәм аның әйберләре арасында урланган бурка табып алалар.

***

Шулай ук Мөхәммәт пәйгамбәребез (саллаллаһү галәйһи вә сәлләм): «Аллаһы Тәгалә чистарынмаган кешенең намазын һәм урланган мөлкәттән сәдаканы кабул итми», – диде (Мөслим, Тирмизи хәдис җыентыкларыннан).

***

Зәйд ибн Хәлид әл-Җүхәни сөйли: «Бер кеше Хәйбар походы вакытында сугыш табышының ниндидер өлешен урлаган булган. Ул үлгәннән соң, Аллаһ рәсүле (саллаллаһү галәйһи вә сәлләм) аңа җеназа намазы укудан баш тартты һәм: «Аллаһ юлында ул сугыш табышының бер өлешен урлады», – диде. Бу сүзләрдән соң без аның әйберләрен карап чыктык һәм анда ике дирхәмлек муенса таптык» (Әбү Давыт, ән-Нәсаи, Имам Мәлик хәдис китапларыннан).

***

Имам Әхмәд: «Без Аллаһ илчесенең (саллаллаһү галәйһи вә сәлләм) дәүләт мөлкәтен урлаучыдан һәм үз-үзенә кул салучыдан башка кемгәдер җеназа намазы укудан баш тартканын хәтерләмибез», – ди.

Дини матбугаттан.

Дәүләтнекен урлау батырлыкмы?
Дәүләтнекен урлау батырлыкмы?
Автор:Дильбар Сулейманова
Читайте нас: